ރައީސް ނަޝީދާ ނުލައި އެމްޑީޕީއެއް ނޯންނާނެ: ޤާސިމް

ކުރީގެ ރައީސް އަދި ސަރުކާރު ހިންގާ މައި ޕާޓީގެ ރައީީސް މުޙައްމަދު ނަޝީދާ ނުލައި، އެމްޑީޕީ ނޯންނާނެ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

Ads by Hajj Corporation

ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރުކަންވެސް ކުރައްވާ ޤާސިމް މިހެން ވިދާޅުވެފައިވަނީ ޖޭޕީގެ ޤައުމީ ކޮންފަރެންސް ނިންމުމުގެ ޖަލްސާގައި ވާހަކަދައްކަވަމުންނެވެ.

ގާސިމް ވިދާޅުވީ ރައީސް ނަޝީދަށް ވެރިކަން ގެއްލުނީ ދުނިޔޭގެ ކަންކަމުގައި ތަޖުރިބާ ހުންނަންޖެހޭ ވަރަށް ލިބިފައި ނެތުމުން ކަމަށާއި އޭގެ ސަބަބުން ގޯހެއް ހެއްދެވުނީ ކަމަށެވެ. އަދި މިހާރު އެކަން ރަނގަޅުވެފައި ހުންނާނެ ކަމަށް ދެކެވަޑައިގަންނަވާ ކަމަށާއި ރައީސް ނަޝީދާ ނުލާ އެމްޑީޕީ އޮންނާނެ ކަމަށް ޤަބޫލުނުކުރައްވާ ކަމަށް ވެސް ވިދާޅުވިއެވެ.

"އެމްޑީޕީ މަނިކުފާނާ ނުލައެއް އޮންނާނެ އެއްޗެއް ކަމަކަށް ޤަބޫލެއް ނުކުރަން. އެއީ އަޅުގަނޑުގެ ވިސްނުން." ޤާސިމް ވިދާޅުވި އެވެ.

އިންސާނުންނަށް ގޯސް ވެސް ހެދޭނެ ކަމަށާއި އަދި ކުށްވެސް ކުރެވޭނެ ކަމަށާއި ނަމަވެސް ތައުބާވުމަކީ އޮތް ކަމެއް ކަމަށް ޤާސިމް ވިދާޅުވިއެވެ.

ޤާސިމް މިހެން ވިދާޅުވެފައިވާއިރު ނިމިގެންދިޔަ އެމްޑީޕީގެ ރިޔާސީ ޕްރައިމަރީން ނާކާމިޔާބީއާ ކުރިމަތިލާން ޖެހިވަޑައިގަތް ރައީސް ނަޝީދު މިހާރު ގެންދަވަނީ، ރައީސް އިބްރާހީމް މުޙައްމަދު ޞާލިޙާ ފެއަށް ޖެހިވަޑައިގެން، "ފިކުރެއްގެ ދިރުން" ގެ ނަމުގައި އެމްޑީޕީގެ ތެރޭގައި ވަކި ސިޔާސީ ހަރަކާތެއް ހިންގަވަން މަސައްކަތްކުރައްވަމުންނެވެ. އަދި މި އަހަރުގެ ރިޔާސީ އިންތިޚާބަށް ރައީސް ނަޝީދާއި ޤާސިމް ކޯލިޝަން ހައްދަވައިފާނެ ކަމަށްވެސް ބައެއް ފަރާތްތަކުން ދަނީ ބުނަމުންނެވެ.

ޖޭޕީން ވަނީ، މި އަހަރުގެ ރިޔާސީ އިންތިޚާބަށް ނުކުންނަން ނިންމައިފައެވެ.