ގުރައިދޫ ދާއިރާގެ ޕްރައިމަރީއަށް ޕީޕީއެމުން ވެސް ހުޅުވައިލައިފި
ގުރައިދޫ ދާއިރާގެ ހުސްވެފައިވާ ގޮނޑި އަށް މެމްބަރަކު ހޮވަން ބާއްވާ ބައި-އިލެކްޝަންގައި ޕީޕީއެމްގެ ފަރާތުން ވާދަކުރާނެ ކެންޑިޑޭޓަކަށް ހޮވުމަށް ޕްރައިމަރީ އަށް ހުޅުވައިލައިފިއެވެ.
އެ ދާއިރާގެ ގޮނޑި ހުސްވީ، ޕީޕީއެމް މެމްބަރު އިބްރާހީމް ރިޒާ މިދިޔަ މަހުގެ 23 ގައި އަވަހާރަވުމާ ގުޅިގެންނެވެ. އޭނާ އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ދަނިކޮށެވެ.
ޕީޕީއެމުން ބުނީ ޕްރައިމަރީގައި ވާދަކުރަން ޝައުގުވެރިވާ މީހުންނަށް ނަން ހުށަހެޅުމުގެ ފުރުސަތު މިއަދު މެންދުރު ފަހު 2:30 އާ ހަމައަށް އޮންނާނެ ކަމަށެވެ. ޕްރައިމަރީ ބާއްވަން ހަމަޖެހިފައި ވަނީ އަންނަ ހުކުރު ދުވަހުއެވެ.
ގުރައިދޫ ދާއިރާގެ ބައި-އިލެކްޝަން ބާއްވަން އިލެކްޝަން ކޮމިޝަން (އީސީ) އިން ނިންމާފައި ވަނީ އަންނަ މަހުގެ 15 ގައެވެ. އަދި އެ އިންތިޚާބަށް ކުރިމަތިލުމަށް ނަން ހުށަހަޅަން ފުރުސަތު ދީފައި ވަނީ މި މަހުގެ 13 އާ ހަމައަށެވެ.
ގުރައިދޫ ދާއިރާގެ ބައި-އިލެކްޝަނަށް ޕީއެމާއި އެމްޑީޕީގެ އިތުރުން އެމްއެންޕީން ވެސް ވާދަކުރާނެއެވެ.
