ރައީސް ނަޝީދަށް ދިން ހަމަލާގެ ޝަރީޢަތް ލަސްވާތީ، ކަންބޮޑުވުން ފާޅުކުރައްވައިފި
އޭނާ ކުރެއްވި ޓުވީޓެއްގައި ވިދާޅުވީ، އެ މައްސަލައާ ގުޅޭ ގޮތުން މަޝްވަރާކުރުމަށް މިދިޔަ ހަފުތާގައި ކްރިމިނަލް ކޯޓުގެ ރަޖިސްޓްރާ ހުސައިން ރަޝީދާ ބައްދަލުކުރައްވައިފައިވާ ކަމަށާއި، އެ ބައްދަލުކުރެއްވުމުގައި، ހަމަލާއާ ގުޅިގެން ހައްޔަރުކޮށްފައިވާ މީހުންގެ ޝަރީޢަތް ލަސްވަމުން ދާތީ އެކަމުގެ ކަންބޮޑުވުން ފާޅުކުރެއްވި ކަމަށެވެ.
"މި މައްސަލައިގެ ޝަރީޢަތް ލަސްވާން ޖެހޭ ކަމަށް ޤަބޫލުކުރެވޭ ސަބަބުތަކެއް ރާއްޖޭގެ ޝަރުޢީ އިދާރާތަކަށް ދެއްކިފައެއް ނެތް," އައްބާސް ވިދާޅުވިއެވެ.
މީގެ ކުރިން ވެސް، މި މައްސަލައިގެ ޝަރީޢަތް ލަސްވާތީ އައްބާސް ކަންބޮޑުވުން ފާޅުކުރެއްވިއެވެ.
ރައީސް ނަޝީދުގެ ހަށިކޮޅަށް އަމާޒުކޮށްގެން ދީފައިވާ ޓެރަރިސްޓް ހަމަލާއާ ގުޅިގެން، ކުރިޔަށްދާ ތަހުޤީޤާ ގުޅޭ ކަންކަން ގާތުން ބެއްލެވުމަށްޓަކައި ރައީސުލްޖުމްހޫރިއްޔާގެ ޚާއްސަ މަންދޫބެއްގެ ގޮތުން އިނގިރޭސިވިލާތުގެ ރައްޔިތެއްކަމަށްވާ އައްބާސް ހަމަޖައްސަވާފައި ވަނީ 2021 ވަނަ އަހަރުގެ މެއި މަހުގެ 19 ވަނަ ދުވަހުއެވެ.
އެ އެންމެންގެ މައްޗަށް ވެސް ޓެރަރިޒަމްގެ ދަޢުވާ އުފުލައިފައިވާއިރު، އެ އެންމެން ޝަރީޢަތް ނިމެންދެން ވަނީ ބަންދުކޮށްފައެވެ.
