ޗައިނާގެ ކަނޑުގެ ސަރަޙައްދުގައި އެމެރިކާގެ މަނަވަރެއް
ޗައިނާގެ ކަނޑުގެ ސަރަޙައްދަށް އެމެރިކާގެ އަސްކަރީ މަނަވަރެއް ވަދެފައިވާ ކަމުގައި ޗައިނާގެ އަސްކަރިއްޔާއިން ބުނެފިއެވެ. ޗައިނާގެ އަސްކަރިއްޔާގެ ސަދަން ތިއޭޓަރ ކޮމާންޑުން ބުނީ، އެމެރިކާގެ އަސްކަރީ މަނަވަރު ދަތުރުކޮށްފައި ވަނީ ދެކުނު ޗައިނާ ކަނޑުގައި އޮންނަ ރަށްތަކެއް ކަމުގައިވާ ޕަރަސެލް އައިލެންޑްސް ކައިރިން ކަމުގައެވެ.
އެ ސަރަޙައްދަށް ވަދެފައި ވަނީ އެމެރިކާގެ އަސްކަރިއްޔާގެ މަނަވަރެއް ކަމުގައިވާ ޔޫ.އެސް.އެސް. މިލިޔަސްއެވެ. އެއީ، އަރލީބަރކް މަރުކާގެ ގައިޑެޑް މިސައިލް ޑިސްޓްރޯޔަރ މަނަވަރެކެވެ. ޕަރަސެލް އައިލެންޑްސް ކައިރިއަށް އެ މަނަވަރު ވަނުމާ އެކު، ޗައިނާގެ އަސްކަރީ މަނަވަރުތަކުން ހަރަކާތްތެރިވެ، އެމެރިކާގެ މަނަވަރު ފައްސައިލާފައިވާ ކަމުގައި ޗައިނާއިން ބުންޏެވެ.
ޗައިނާގެ ސަދަން ތިއެޓަރ ކޮމާންޑުގެ ތަރުޖަމާނު ޓިއާން ޖުންލީ ވިދާޅުވީ، އެމެރިކާގެ އަސްކަރިއްޔާއިން ހިންގާފައިވާ އަމަލަކީ، އެ ސަރަޙައްދުގެ ހަމަޖެހުމާއި ސަލާމަތަށް ނުރައްކާވާ ފަދަ އަމަލެއް ކަމުގައެވެ. އަދި، މި ހާދިސާއާ ގުޅިގެން ޗައިނާގެ މަނަވަރުތައް ތައްޔާރީ ހާލަތަކަށް ގެނެސްފައިވާ ކަމުގައި ވެސް އޭނާ ވިދާޅުވިއެވެ. އަދި، ޗައިނާގެ މިނިވަންކަމާއި ސިޔާދަތު ހިމާޔަތްކުރުމަށް ކުރަންޖެހުނު ކޮންމެ ކަމަކަށް ޗައިނާގެ އަސްކަރިއްޔާއިން ތައްޔާރަށް އޮތް ކަމުގައި ވެސް އޭނާ ވިދާޅުވިއެވެ.
ޗައިނާގެ ކަނޑުގެ ސަރަޙައްދަށް އެމެރިކާގެ އަސްކަރީ މަނަވަރު ވަދެފައިވާ ކަމަށް ޗައިނާއިން ކުރާ ތުހުމަތުތައް އެމެރިކާއިން ދޮގުކުރެއެވެ. އެމެރިކާގެ ކަނޑުގެ ސިފައިން ބުނީ، ޗައިނާއިން ބުނާ މަނަވަރު ދަތުރުކޮށްފައި ވަނީ ދެކުނު ޗައިނާ ކަނޑުގެ ބައިނަލްއަޤުވާމީ ކަނޑުގެ ސަރަޙައްދުން ކަމުގައެވެ. އަދި، ޗައިނާގެ ސަރަޙައްދަށް އެ އުޅަނދު ވަދެފައި ނުވާނެ ކަމަށް ވެސް އެމެރިކާގެ ކަނޑުގެ ސިފައިން ބުނެއެވެ.
އެމެރިކާގެ ކަނޑުގެ ސިފައިންގެ ސެވަންތް ފްލީޓްއިން ނެރުނު ބަޔާނެއްގައި ބުނެފައި ވަނީ، ބައިނަލްއަޤުވާމީ ވަޔާއި ކަނޑުގެ ސަރަޙައްދުތަކުގައި އެމެރިކާގެ އަސްކަރީ އުޅަނދުފަހަރަށް ހަރަކާތްތެރިވުމަށް އެއްވެސް ހުރަހެއް ނެތް ކަމަށާއި، ބައިނަލްއަޤުވާމީ ޤާނޫނުތަކާ އެއްގޮތަށް އެމެރިކާގެ އަސްކަރިއްޔާއިން އަމަލުކުރަމުންދާނެ ކަމުގައެވެ.
މި ހާދިސާ ހިނގާފައި މި ވަނީ، ޗައިނާއާއި އެމެރިކާއާ ދެމެދު ގުޅުންތައް ހީނަރުވެފައިވާ ދަނޑިވަޅެއްގައެވެ. އޭޝިޔާ އަދި ޕެސިފިކް ކަނޑުގެ ސަރަޙައްދުގައި ބާރާއި ނުފޫޒު ގަދަކުރަން ޗައިނާއިން ކުރަމުންދާ މަސައްކަތްތައް ހުއްޓުވަން އެމެރިކާއިން ދަނީ އެ ސަރަޙައްދުތަކުގެ ޤައުމުތަކާ ގުޅިގެން މަސައްކަތް ކުރަމުންނެވެ. މި ކަމުގައި އެމެރިކާއާއި އެއްބައިވެފައިވާ ޤައުމުތަކުގެ ތެރޭގައި ދެކުނު ކޮރެޔާ، ޖަޕާން، އޮސްޓްރޭލިޔާ، އަދި އިންޑިޔާ ވެސް ހިމެނެއެވެ.
