އީވާ ވިދާޅުވަނީ، މި ސަރުކާރަށް ގޮތް ހުސްވަމުންދާ ކަމަށް
ރައީސް އިބްރާހީމް މުޙައްމަދު ޞާލިޙުގެ ސަރުކާރަށް ގޮސް ހުސްވަމުން އަންނަ ކަމަށް ވިދާޅުވެ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ، ވަރަށް ބޮޑަށް ފާޑުވިދާޅުވެއްޖެއެވެ.
އޭނާ މިހެން ވިދާޅުވީ، ރައީސް އޮފީހުގެ މިނިސްޓަރުގެ މަޤާމުން، މުޙައްމަދު ޝިފާޒު ވަކި ކުރުމާ ގުޅިގެން މިއަދު ކުރެއްވި ޓްވީޓެއްގައެވެ.
ވިދާޅުވީ އެމްޑީޕީ ނެގެހެއްޓުމަށް ނުހަނު ދައްޗާއި އަނިޔާގައި މިނިސްޓަރު ޝިފާޒު ކުރެއްވި ގަދަފަދަ މަަސައްކަތް އަގު ނުކުރެވޭނެކަމަށެވެ.
އޭނާ ވިދާޅުވީ ރައީސް ޞާލިޙަށް އެ މަޤާމުގައި ހުންނެވެނީ މިނިސްޓަރު ޝިފާޒު ފަދަ އެތައް ބައެއްގެ ހިންމަތުންކަން ހަނދާން ނައްތާލައްވައި، މަޤާމުން ވަކިކުރުމަކީ ވަރަށް ދެރަ ކަމެއްކަމަށެވެ.
ޝިފާޒަކީ އެމްޑީޕީގެ ނައިބު ރައީސް ވެސް މެއެވެ. ޝިފާޒް ގެންދަވަނީ ސަރުކާރާ ދެކޮޅަށް ރައީސް ނަޝީދު ފައްޓަވައިގެން އުޅުއްވާ "ފިކުރެއްގެ ދިރުން" ކެންޕެއިންގައި ފުޅާ ދާއިރާއެއްގައި ހަރަކާތްތެރިވަމުންނެވެ. ޝިފާޒަކީ ރައީސް ނަޝީދާ ވަރަށް އަރިސް ބޭފުޅެކެވެ.
ރައީސް އިބްރާހިމް މުޙައްމަދު ޞާލިޙު ވެރިކަމަށް ވަޑައިގަތުމަށް ފަހު ކެބިނެޓުގެ ބޭރުން ސިޔާސީ މަގާމަކަށް އެންމެ ފުރަތަމަ އައްޔަނުކުރި ބޭފުޅުންގެ ތެރޭގައި ޝިފާޒް ހިމެނެއެވެ.
