އެމްޑީޕީގެ ޕްރައިމަރީ އަލުން ބާއްވަން ހުށަހެޅި މައްސަލަ ބޭރުކޮށްލައިފި
މި އަހަރުގެ ސެޕްޓެމްބަރު މަހުގައި ބާއްވާ ރިޔާސީ އިންތިޚާބަށް އެމްޑީޕީން ވާދަކުރައްވާ ކެންޑިޑޭޓަކު ހޮވުމަށް ބޭއްވި ޕްރައިމަރީ އަލުން ބާއްވަން އެދި ސިވިލް ކޯޓަށް ހުށަހެށި މައްސަލަ ކުރިއަށް ގެންދެވެން ނެތް ކަމަށް ނިންމައިފިއެވެ.
އެމްޑީޕީގެ ޕްރައިމަރީ ބޭއްވީ، މި އަހަރުގެ ޖެނުއަރީ މަހުގެ 28 ވަނަ ދުވަހުއެވެ. މި ޕްރައިމަރީން ކާމިޔާބު ލިބިވަޑައިގެންނެވީ ރައީސް އިބްރާހީމް މުޙައްމަދު ޞާލިޙަށެވެ.
އެމްޑީޕީން ކުރި ޓްވީޓެއްގައި ބުނީ، ރިޔާސީ ޕްރައިމަރީ ބާތިލު ކޮށްދިނުމަށާއި، އަލުން ބާއްވައިދިނުމަށް އެމްޑީޕީގެ މައްޗަށް ހުށަހެޅި މައްސަލައިގައި ދައުވާކުރުމަށް އެކަށީގެންވާ މަސްލަހަތާއި ހައިސިއްޔަތު، ދައއުވާ ހުށަހެޅި ފަރާތުގެ ނެތްކަމަށް ކަނޑައަޅައި އެ މައްސަލަ ކުރިއަށް ގެންދެވެން ނެތްކަމަށް ސިވިލް ކޯޓުން ނިންމާފައިވާ ކަމަށެވެ.
ޕްރިމަރީ އާ ގުޅިގެން ކޯޓަށް ތިން މައްސަލައެއް ހުށަހެޅިއިރު، އެއް މައްސަލަ އަކީ ހެންވޭރު ދެކުނު ދާއިރާގެ ކުރީގެ މެންބަރު އަދި މިހާރު ޕޮލިސް ބޯޑުގައި އިންނަވާ ހާމިދު އަބްދުލްޣަފޫރު ހުށަހެޅުއްވި މައްސަލައެކެވެ. ނަމަވެސް ސިވިލް ކޯޓުން ބަލައިގެންފައިވާ މައްސަލަ ހުށަހަޅާފައި ވަނީ ދަ ލިޓީޖަންޓްސް އެލްއެލްޕީގެ ފަރާތުން ވަކީލު އަލީ އަމްޖަދު ހުށަހެޅުއްވި މައްސަލައެވެ.
ސިވިލް ކޯޓަށް ހުށަހެޅި އެ މައްސަލައިގައި ބުނެފައި ވަނީ ޕާޓީގެ މެންބަރަކު ވަކިކުރުމަކީ މެންބަރާ މެދު އަޅާ ފިޔަވަޅެއްކަން އަސާސީ ގަވާއިދުން އެނގެން އޮންނަ ކަމަށާއި، އެ ޕާޓީން 39،000 މެންބަރުން ވަކި ކުރީ ފިޔަވަޅު އެޅުމުގައި އަމަލު ކުރަންޖެހޭ އިޖުރާއަތުތަކާ ހިލާފަށް ކަމަށެވެ. އެހެންކަމުން އެ މެންބަރުންނަށް ވޯޓު ދިނުމުގެ ހައްގު ގެއްލޭގޮތަށް ބޭއްވި އިންތިހާބު ސައްޙަ ނޫން ކަމަށް ކަނޑައަޅައި ދީ އެ މެންބަރުން ހިމަނައިގެން އަލުން އިންތިހާބު ބޭއްވުމަށް އެމްޑީޕީގެ މައްޗަށް އަމުރެއް ނެރެދިނުމަށެވެ.
އަދި ކޯޓަށް ހުށަހެޅި މި މައްސަލައިގައި ވަކި ގޮތެއް ނިންމުމުގެ ކުރިން އެމްޑީޕީ ޕްރައިމަރީ ކާމިޔާބު ކުރެއްވި ކެންޑިޑޭޓަށް ރިޔާސީ ޓިކެޓު ހަވާލުކުރުން ހުއްޓުވުމުގެ އަމުރެއް ނެރެދިނުމަށް ވެސް އެދިފައި ވެއެވެ.
