ހިޔާފުލެޓުގެ ބެލްކަނިން ސިނގިރޭޓް އުކާ މީހުންނާމެދު ހަރުކަށި ފިޔަވަޅު އަޅަނީ!
ހިޔާފުލެޓުގެ ބެލްކަނިން ސިނގިރޭޓް އުކާ މީހުންނާމެދު ހަރުކަށި ފިޔަވަޅު އަޅާނެކަމަށް އާބަންކޯ އިން ބުނެފިއެވެ.
ހިޔާ ފުލެޓެއްގެ ބެލްކަނީގައި ރޭވެސް އަލިފާނުގެ ހާދިސާއެއް ހިނގާފައިވާއިރު މިއީ މިމަހު ހިނގި މިފަދަ ދެވަނަ ހާދިސާއެވެ.
މިކަމާއި ގުޅިގެން ރޭ އާބަންކޯ އިން ބުނީ އެންމެ މީހަކު ކުރާ މިފަދަ އަމަލެއްގެ ސަބަބުން އެތައް ރައްޔިތުންނެއްގެ ފުރާނައާއި މުދަލަށް ގެއްލުންވެ މިފަދަ އަމަލެއްގެ ސަބަބުން މިއަށްވުރެވެސް ނުރައްކާތެރި ހާދިސާއެއް ކުރިމަތިވުމުގެ ފުރުސަތު އޮތުމާއިއެކު އެފަދަ ފަރާތްތަކާއި މެދު ހަރުކަށި ފިޔަވަޅު އަޅާނެކަމަށް އެކުންފުނިން ވަނީ ބުނެފައެވެ.
"މިފަދަ ޢަމަލުތައް ކުރާ ފަރާތްތަކާއި ޔުނިޓްތައް ދެނެގަނެ ހަރުކަށި ފިޔަވަޅު އަޅާނެ ވާހަކަ ދެންނެވީމެވެ. މި ފަދަ ހާދިސާތައް ތަހުޤީޤު ކުރުމަށްފަހު ރައްޔިތުންގެ ސަލާމަތަށް އިހްމާލުވެފައިވާ ފަރާތްތަކުގެ ޔުނިޓް އަތުލުމުގެ ފުރުސަތުވެސް އޮންނާނެއެވެ" އާބަންކޯ އިން ބުނެފައިވެއެވެ.
މީގެއިތުރުން އެކަކު އަނެކަކަށް އިޙްތިރާމްކޮށް، އެކުގައި ދިރިއުޅޭ އަވަށްޓެރިންގެ ރައްކާތެރިކަމާއިމެދެ ފަރުވާތެރިވެ މިފަދަ ކަންކަން ތަކުރާރުވިޔަ ނުދިނުމަށްޓަކައި ހުޅުމާލޭގެ ފްލެޓްތަކުގައި ދިރިއުޅޭ ރައްޔިތުންވެސް އާބަންކޯއާއި ގުޅިގެން މަސައްކަތް ކުރުމަށް އެކުންފުނިން ރޭ ވަނީ އިލްތިމާސްކޮށްފައެވެ.
