ކާމިޔާބީއަށްފަހު، ޝާޒްގެ ޚާއްސަ ޝުކުރެއް ރައީީސް އަށް
ރައްޔިތުންގެ މަޖިލީހުގެ ގުރައިދޫ ދާއިރާގެ ގޮނޑި ކާމިޔާބު ކުރެއްވި އިބްރާހީމް ޝާޒް، ރައީސް އިބްރާހީމް މުޙައްމަދު ޞާލިޙު ދެއްވި ލަފަޔާއި، ބެހެއްޓެވި ގާތްކަމަށްޓަކައި ޝުކުރު އަދާ ކުރައްވައިފިއެވެ.
ގުރައިދޫ ދާއިރާގެ ބައި-އިލެކްޝަން ކާމިޔާބުވުމުން، ޝާޒް ވިދާޅުވީ، އޭނާއަށް ލިބިވަޑައިގަތް ތާރީޚީ ކާމިޔާބީ ހާސިލުކޮށްދިނުމަށް މަސައްކަތް ކޮށްދެއްވި އެންމެހާ ރައްޔިތުންނަށް ޝުކުރު ދަންނަވާ ކަމަށެވެ. އަދި އޭނާގެ ކެމްޕެއިން ޓީމުގެ މަސައްކަތް ވެސް، ޝާޒް ފާހަގަކުރެއްވިއެވެ.
"ދިވެހިރާއްޖޭގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙު އަޅުގަނޑަށް ދެއްވި ލަފަޔާ، ދެއްވި ހިތްވަރާ، ބެހެއްޓެވި ގާާތްކަމަށްޓަކައި، އެމަނިކުފާނަށް ޚާއްސަ ޝުކުރެއް ދަންނަވަން."
ޝާޒް އިތުރަށް ވިދާޅުވީ، ގުރައިދޫ ދާއިރާގެ ރައްޔިތުންނާއެކުގައި އޭނާ ދެމިހުންނަވާނެކަމުގެ ޔަޤީންކަން އަރުވާ ކަމަށެވެ.
މިއަދު ބޭއްވި ބައި-އިލެކްޝަންގެ ވަގުތީ ނަތީޖާ ދައްކާގޮތުން ޕީޕީއެމްގެ ކެންޑިޑޭޓް ޙުސައިން ރިޒާއަށް 1226 ވޯޓު ލިބުނުއިރު އެމްޑީޕީގެ ކެންޑިޑޭޓް އިބްރާހީމް ޝާޒްއަށް 1341 ވޯޓު ލިބިފައިވެއެވެ. އަދި އެމްއެންޕީގެ ޢަލީ އާރިފަށް 136 ވޯޓު ލިބިފައިވެއެވެ.
މާލޭގައި ބަހައްޓާފައިވާ ވޯޓުފޮށިން ކުރިހޯދާފައިވަނީ ޝާޒްއެވެ. މާލޭގައި ބަހެއްޓި ވޯޓު ފޮށިން އެމްޑީޕީގެ އިބްރާހިމް ޝާޒްއަށް 162 ވޯޓު ލިބުނުއިރު ޕީޕީއެމްގެ ހުސައިން ރިޒާއަށް ލިބިފައިވަނީ 150 ވޯޓެވެ.
އަދި އެމްއެންޕީގެ ޢަލީ އާރިފަށް ލިބިފައިވަނީ 20 ވޯޓެވެ. ގުރައިދޫގައި ބެހެއްޓި ދެ ވޯޓި ފޮށިން ޕީޕީއެމްގެ ރިޒާއަށް ޖުމުލަ 429 ވޯޓު ލިބުނުއިރު އެމްޑީޕީގެ ޝާޒްއަށް ލިބިފައިވަނީ 419 ވޯޓެވެ.
އެމްއެންޕީއަށް ގުރައިދޫން ލިބުނީ 49 ވޯޓެވެ. މާފުށީގައި ބެހެއްޓި ދެ ވޯޓު ފޮށީގެ ނަތީޖާއަށް ބަލާއިރު އެމްޑީޕީގެ ޝާޒަށް 504 ވޯޓު ލިބުނުއިރު ޕީޕީއެމްގެ ރިޒާއަށް ލިބުނީ 405 ވޯޓެވެ. އަދި އެމްއެންޕީއަށް އެ ފޮށިން ލިބުނީ 51 ވޯޓެވެ. މީގެއިތުރުން ގުޅީގައި ބެހެއްޓި ވޯޓު ފޮށިން އެމްޑީޕީގެ ޝާޒް އަށް 256 ވޯޓު ލިބުނުއިރު ރިޒާއަށް 242 ވޯޓު އަދި އާރިފަށް 16 ވޯޓު ލިބިފައިވެއެވެ.
މި އިންތިޚާބުގައި 3423 މީހުންނަށް ވޯޓުލުމުގެ ހައްޤު ލިބިގެންވާއިރު ވޯޓު ލާފައިވަނީ 2755 މީހުންނެވެ.
Ads by STO
