އިންތިޚާބު ކާމިޔާބު ކުރުމަށް، އެމްޑީޕީގެ ފެކްޝަނަކާއެކު މަސައްކަތެއް ނުކުރަން: ސެމްބެ
ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)އިން މިހައިތަނަށް، އެމްޑީޕީގެ ފެކްޝަނަކާއެކުގައި އިންތިޚާބެއް ކާމިޔާބު ކުރަން މަސައްކަތް ކޮށްފައި ނުވާ ކަމަށް މަޖިލީހުގެ ފަރެސްމާތޮޑާ ދާއިރާގެ މެމްބަރު ޙުސައިން މުޙައްމަދުލަ ލަޠީފު(ސެމްބެ) ވިދާޅުވެއްޖެއެވެ.
ގުރައިދޫ ދާއިރާގެ ބައި-އިލެކްޝަން ޕީޕީއެމަށް ކާމިޔާބު ކޮށްދިނުމަށް، ރައީސް މުޙައްމަދު ނަޝީދުގެ "ފިކުރެއްގެ ދިރުން" ފެކްޝަނުން މަސައްކަތް ކުރެއްވި ކަމަށާއި، އެކަމަށްޓަކައި ޝުކުރު އަދާ ކުރައްވާ ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފު އުމަފު ވިދާޅުވުމާ ގުޅިގެންނެވެ.
ސެމްބެ ވިދާޅުވީ އެއީ "ބޮޑު އޮޅުމެއް" ކަމަށާއި، ޕީޕީއެމުން މިހައިތަނަށް، އިންތިޚާބެއް ކާމިޔާބު ކުރުމަށް، އެމްޑީޕީގެ ފެކްޝަނަކާއެކު މަސައްކަތް ނުކުރާ ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އާދަމް ޝަރީފު ވިދާޅުވީ ގުރައިދޫ ދާއިރާގެ އިންތިޚާބުގައި ވަރަށް ވާދަވެރިކޮށް މަސައްކަތް ކުރެއްވި އަދި ޕީޕީއެމަށް ވޯޓު ދެއްވި އެންމެހައި ބޭފުޅުންނަށް ވެސް ޝުކުރު ދަންނަވާކަމަށެވެ.
"އިންތިޚާބުގައި ވަރަށް ވާދަވެރިކޮށް މަސައްކަތް ކުރެއްވި އަދި ޕީޕީއެމަށް ވޯޓު ދެއްވި އެންމެހާ ބޭފުޅުންނަށް ވެސް އަޅުގަނޑުމެން ޝުކުރު ދަންނަވަމުން މި އިންތިހާބު ޕީޕީއެމަށް ކާމިޔާބު ކޮށްދެއްވުމަށްޓަކައި ފިކުރެއްގެ ދިރުމެއްގެ ފަރާތުން ވެސް ވަރަށް ބޮޑު އެހީތެރިކަމެއް ފޯރުކޮށްދެއްވާފައިވާތީވެ އެ ބޭފުޅުންނަށް ވެސް އަޅުގަނޑު ޝުކުރު ދަންނަވަން." އާދަމް ޝަރީފު ވިދާޅުވިއެވެ.
ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަން ކާމިޔާބު ކުރެއްވި އެމްޑީޕީގެ ކެންޑިޑޭޓް އިބްރާހިމް ޝާޒް، އެގޮނޑި ކާމިޔާބު ކުރީ ދާއިރާގެ މެޖޯރިޓީ ވޯޓު ހޯއްދަވައިގެންނެވެ. މި އިންތިޚާބުގައި އިދިކޮޅު ޕީޕީއެމްގެ ކެންޑިޑޭޓެއްގެ އިތުރުން އެމްއެންޕީގެ ކެންޑިޑޭޓެއްވެސް ވަނީ ވާދަކުރައްވައިފައެވެ.
