ފަސް ޖުޑީޝަލް ދާއިރާއަކަށް މެޖިސްޓްރޭޓުން އައްޔަނު ކުރައްވައިފި
ފަސް ޖުޑީޝަލް ދާއިރާއެއްގެ އިސް މެޖިސްޓްރޭޓް ކަމަށް ބޭފުޅުން އައްޔަން ކުރައްވައި، އެބޭފުޅުންނަށް މަޤަަމުގެ ފަތްކޮޅު އަރުވައިފިއެވެ.
މިގޮތުން މަޤާމަށް އައްޔަނު ކުރެވުނު ބޭފުޅުންނަކީ ،ށ.ޖުޑީޝަލް ދާއިރާއަށް ށ.މިލަންދޫ ކެތީހައުސް ޙަސަން ޝިޔާމާއި، ނ.ޖުޑީޝަލް ދާއިރާއަށް ނ.ޅޮހީ ސަންޝައިން އަޙްމަދު ޙަސަން މަނިކާއި، ބ.ޖުޑީޝަލް ދާއިރާއަށް ބ.މާޅޮސް ނަފާޕެލަސް ޢަބްދުއްރަޝީދު ޔޫސުފާއި، ވ.ޖުޑީޝަލް ދާއިރާއަށް ބ.ކިހާދޫ ގާރޑެނިޔާވިލާ ޢަލީ ނަޞީރާއި، މ.ޖުޑީޝަލް ދާއިރާއަށް މ.ކޮޅުފުށީ ލިލީމާގެ އަލްއުސްތާޛު އަޙްމަދު ނަޖީބެވެ.
މީގެތެރެއިން ޙަސަން ޝިޔާމް ކުރިން ހުންނެވީ ށ.މިލަންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަޤާމުގައެވެ.
އަޙްމަދު ޙަސަން ހުންނެވީ ނ.ޅޮހީ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަޤާމުގައެވެ.
ޢަލީ ނަޞީރު ހުންނެވީ ވ.ފެލިދޫ މެޖިސްޓްރޭޓް ކޯޓުގެ މެޖިސްޓްރޭޓްގެ މަޤާމުގައެވެ.
އަޙްމަދު ނަޖީބު ހުންނެވީ މ.ކޮޅުފުށީ މެޖިސްޓްރޭޓް ކޯޓުގެ މެޖިސްޓްރޭޓްގެ މަޤާމުގައެވެ.
ޢަބްދުއްރަޝީދު ޔޫސުފަކީ 1995 އިން 1998 އަށް ފަނޑިޔާރުކަމުގައި ހުންނެވުމަށްފަހު ވަކިވެވަޑައިގަތުމަށްފަހު 2013 ޖަނަވަރީ 08 ވަނަ ދުވަހު އަލުން ފަނޑިޔާރުކަމަށް އައްޔަންކުރެވިފައިވާ ބޭފުޅެކެވެ.
ބ.ޖުޑީޝަލް ދާއިރާއަށް އިސް މެޖިސްޓްރޭޓްގެ މަޤާމަށް އައްޔަންކުރުމުގެ ކުރިން އެ ބޭފުޅާ ހުންނެވީ، ބ.މާޅޮހު މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަޤާމުގައެވެ.
