އިތުބާރު ނެތް ކަމުގެ މައްސަލަ ކުރިޔަށް ނުގެންގޮސް ވެސް މަޖިލީހުގެ މަސައްކަތް ކުރިޔަށް ގެންދެވޭނެ: އަމީން އާންމު
ރައްޔިތުންގެ މަޖިލީހުގެ ނައިބު ރައީސް, އީވާ އަބްދުﷲގެ އިތުބާރު ނެތް ކަމުގެ މައްސަލަ ހުށަހަޅިފައި އޮތްނަމަވެސް, އެކަން ޕާކްކޮށްފައި އިތުރު އެހެން މަސައްކަތް ރައްޔިތުންގެ މަޖިލީހަށް ކުރެވޭނެ ކަމަށް ރައްޔިތުންގެ މަޖިލީހުގެ އަމީން އާންމު ފާތިމަތު ނިޔުޝާ މިއަދު ވިދާޅުވެއްޖެއެވެ.
ނިއުޝާ އެފަދައިން ވިދާޅުވީ އީވާގެ އިތުބާރު ނެތްކަމުގެ މައްސަލަ އެޖެންޑާނުކޮށް އެހެން މައްސަލަ އެއް އެޖެންޑާ ނުކުރެވޭނެ ކަމަށް އެމްޑީޕީގެ ޕީޖީން ބުނި ބުނުމަށް ރައްދު ދެއްވަމުންނެވެ.
އެމްޑީޕީގެ ޕީޖީ ލީޑަރު އަސްލަމަށް ނިއުޝާ ފޮނުއްވި ސިޓީ މިއަދު ވަނީ, މަޖިލިސް މެންބަރުން ތިއްބަވާ ވަޓްސްއަޕް ގްރޫޕްގައި މަޖިލީހުގެ ރައީސް, މުޙައްމަދު ނަޝީދު އާއްމު ކުރަައްވާފައެވެ.
"އެހެން އެއްވެސް ކަމަކާ މެދު ބަހުސް ކުރުން ނުވަތަ ގޮތެއް ނިންމުން މާނަވެގެން ވަނީ، އެ ގާރުގެ ނޯޓިހުގެ މުއްދަތު ހަމަވެގެން މަޖިލީހުގެ ޖަލްސާއަށް އެ ގަރާރު ހުށަހެޅުމަށް ފަހުގައި،" އެހެންކަމުން، ނިޔުޝާގެ ރައުޔަކީ، މަޖިލީހުގެ ޖަލްސާއަށް އީވާގެ އިތުބާރު ނެތް ކަމުގެ މައްސަލަ އަދި ހުށަހަޅާފައި ނުވާތީ އެކަމާ މެދު ގޮތެއް ނުނިންމިޔަސް، މަޖިލީހުގެ އެހެން މަސައްކަތްތައް ކުރިއަށް ގެންދެވޭނެ ކަމަށެވެ.
އީވާގެ އިތުބާރު ނެތްކަމުގެ މައްސަލަ އެޖެންޑާ ކުރީ އާދިއްތަ ދުވަހަށެވެ. ނަމަވެސް ފަހުން އެ ޖަލްސާ ކެންސަލް ކުރީ މަޖިލީހުގެ މެމްބަރުން ނިސްބަތްވާ ސިޔާސީ ޕާޓީތަކަށް އައި ބަދަލާއި އެކު ކޮމިޓީތަކަށް ބަދަލު ގެންނަން ޖެހޭ ކަމަށާއި، އެކަމުގެ ސަބަބުން އާއްމު ކޮމިޓީގެ ބައްދަލުވުން ނުބޭއްވޭ ކަމަށް ފާހަގަކޮށެވެ. އޭގެ ސަބަބުން އާއްމު ކޮމިޓީން އީވާގެ އިތުބާރު ނެތްކަމުގެ މައްސަލަ ކުރިއަށް ގެންދާނެ ގޮތް ކަނޑަނޭޅިވާ ކަމަށް ވަނީ ބުނެފައެވެ.
