ރިޔާސީ އިންތިހާބުގައި ވޯޓު ލާން އޮންލައިންކޮށްވެސް ރަޖިސްޓްރީ ކުރެވޭނެ
އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވޯޓު ލާން އޮންލައިންކޮށް ރަޖިސްޓްރީ ކުރެވޭގޮތް ހަދަން އިލެކްޝަންސް ކޮމިޝަނުން ނިންމައިފި އެވެ.
މިފަހުން ބާއްވަމުން އަންނަ ބައި-އިލެކްޝަންތަކުގައި މިގޮތަށް ހެދިނަމަވެސް މިއީ ރިޔާސީ އިންތިހާބެއްގައި ވޯޓު ލުމަށް އޮންލައިންކޮށް ރަޖިސްޓްރީ ކުރެވޭގޮތް ހެދި ފުރަތަމަ ފަހަރެވެ.
އިލެކްޝަނުން އަލަށް އެކުލަވައިލި ގަވާއިދުގައި ބުނީ ރީ-ރަޖިސްޓްރޭޝަނަށް ހާއްސަކޮށްފައިވާ ފޯމު، އިލެކްޝަންސް ކޮމިޝަނުން ކަނޑައަޅާ މުއްދަތެއްގައި، ކަނޑައަޅާ ތަނަކަށް ހުށަހެޅޭނެ ކަމަށެވެ. މީގެ އިތުރުން "ކޮމިޝަނުން ކަނޑައަޅާ ނިޒާމު" ގެ ތެރެއިންވެސް ރީ-ރަޖިސްޓްރޭޝަނަށް ހުށަހެޅޭނެކަމަށް ގަވާއިދުގައި ވަނީ ބުނެފަ އެވެ.
ކޮމިޝަނުން ކަނޑައަޅާފައިވާ ނިޒާމަކީ އޮންލައިން ޕޯޓަލްއެއް މެދުވެރިކޮށް ރީ-ރަޖިސްޓްރޭޝަނަށް ހުށަހެޅުމެވެ. އެހެންނަމަވެސް އޭގެ ތެރޭގައި އީމެއިލް މެދުވެރިކޮށް ހުށަހަޅާ ފޯމުތައް ނުހިމެނޭނެކަމަށް ކޮމިޝަނުން ބުނެ އެވެ. އެގޮތަށް ނިންމީ އީމެއިލް މެދުވެރިކޮށް ލިބޭ ފޯމުތަކުގެ ސައްހަކަން ކަށަވަރުކުރަން އުނދަގޫވާނެތީ އެވެ.
އިންތިހާބުގައި ވޯޓު ލާން ރީ-ރަޖިސްޓްރީ ކުރަން ޖެހެނީ އެމީހަކު ރަޖިސްޓްރީ ވެފައި އޮންނަ ރަށް ނޫން އެހެން ރަށެއްގައި ދިރިއުޅޭނަމަ ނުވަތަ ވޯޓު ލާ ދުވަހު ހުންނާނެނަމަ އެވެ. ވޯޓު ލެވޭނީ އިލެކްޝަނުން އެކުލަވައިލާ ރަޖިސްޓްރޭޝަން ފޯމުގައި އޮންނަ ތަނަކަށެވެ.
ރީ-ރަޖިސްޓްރީ ކުރަން ވަގުތު ދިނުމަށްފަހު އެންމެ ފަހުގެ ލިސްޓު ދިވެހި ސަރުކާރުގެ ގެޒެޓުގައި ޝާއިއު ކުރާނެ އެވެ. މީގެ އިތުރުން އެމައުލޫމާތު އިލެކްޝަންސްގެ ވެބްސައިޓުންވެސް ލިބެން ހުންނާނެ އެވެ.
Ads by STO
