އިންތިހާބުގެ މަސައްކަތް ކުރަން އިލެކްޝަނުން 5 މުއައްސަސާއަކާއެކު އެއްބަސްވުމުގައި ސޮއިކޮށްފި
ކުރިޔަށް އޮތް ރިޔާސީ އިންތިޚާބުގެ މަސައްކަތް ކުރަން އިލެކްޝަނުން 5 މުއައްސަސާއަކާއެކު އެއްބަސްވުމުގައި ސޮއިކޮށްފިއެވެ.
އިންތިޚާބުގައި އިލެކްޝަންސް ކޮމިޝަނަށް ބޭނުންވާ އެހީތެރިކަން ފޯރުކޮށްދިނުމަށްޓަކައި ސޮއިކޮށްފައިވަނީ ފުލުހުންނާއި، ސިވިލް ސަރވިސް ކޮމިޝަނާއި، ޑިޕާޓްމަންޓް އޮފް ނެޝަނަލް ރެޖިސްޓްރޭޝަން އަދި ޕޯސްޓް ލިމިޓެޑާއި އެލްޖީއޭއާއެކުއެވެ.
އެ އެއްބަސްވުންތަކުގައި އިލެކްޝަން ކޮމިޝަންގެ ފަރާތުން ސޮއިކުރެއްވީ، އެ ކޮމިޝަންގެ ރައީސް ފުއާދު ތައުފީގެވެ. ފުލުހުންގެ ފަރާތުން ސޮއިކުރެއްވީ ކޮމިޝަނަރު މުހައްމަދު ހަމީދެވެ. ސިވިލް ސާވިސް ކޮމިޝަންގެ ފަރާތުން އެ ކޮމިޝަންގެ ރައީސް މުހައްމަދު ނާސިފް ސޮއިކުރެއްވި އިރު، އެލްޖީއޭގެ ފަރާތުން ސޮއިކުރެއްވީ ޑިރެކްޓާ ޖެނެރަލް ޝަމްއޫން އާދަމެވެ.
ޑިޕާޓްމަންޓް އޮފް ނޭޝަނަލް ރަޖިސްޓޭޝަންގެ ފަރާތުން ސޮއިކުރެއްވީ ޕްލޭނިން މިނިސްޓްރީގެ ޑެޕިއުޓީ މިނިސްޓަރު އައިޝަތު ރަޝީދާއެވެ. އަދި މޯލްޑިވްސް ޕޯޓްސް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އާދަމް މުހައްމަދެވެ.
އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވީ މި ފަހުމުނާމާގެ އަލީގައި ރިޔާސީ އިންތިހާބުގެ މަސައްކަތް އަމާންކަމާއި އޮމާންކަމާއެކު ރައްޔިތުންނަށް ވީހާވެސް ފަސޭހަކޮށް ކުރިއަށް ގެންދެވޭނެ ކަމަށެވެ. އަދި އިންސާފުވެރި މިނިވަން އިންތިހާބެއް ރައްޔިތުންނާ ހަމައަސް ގެންދިއުމުގައި އިތުރު ޔަގީންކަމެއް ލިބިގެންދާނެ ކަމަށް ފުއާދު ވިދާޅުވިއެވެ.
