އީސީގެ ރައީސްގެ މަޤާމަށް ރައީސް ޞާލިޙުގެ އާއިލީ ބޭފުޅަކު އައްޔަނު ކުރަން އުޅޭ ކަމަށް ތުހުމަތުކޮށްފި
އިލެކްޝަންސް ކޮމިޝަނުގެ ރައީސް ފުއާދު ތައުފީގުގެ އިތުބާރު ނެތްކަމަށް ދެއްކުމަށްފަހު، އެ މަޤާމަށް ރައީސް އިބްރާހިމް މުޙައްމަދު ސާލިޙުގެ ގާާތް ބޭފުޅަކު ހަމަޖައްސަވައިފައިވާނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު ވިދާޅުވެއްޖެއެވެ.
ވައްޑޭ މިހެން ވިދާޅުވިއިރު، އެމްޑީޕީގެ ރައީސް ސާލިޙުގެ ފެކްޝަނަށް ނިސްބަތްވެވަޑައިގަންނަވާ އިހަވަންދޫ ދާއިރާގެ މެމްބަރު ޝިފާޢު ފުއާދަށް އިތުބާރު ގެއްލިފައިވާކަމަށް ދޭހަކޮށްދޭ މޭރުމަކުން ވާހަކަ ދައްކަވައިފައެވެ.
އޭނާ ކުރެއްވި ޓްވީޓެއްގައި ވަނީ، ވަކި ސިޔާސީ ބައެއްގެ މުށުތެރޭގައި ފުއާދު ހުންނެވުމަކީ، އީސީގެ މައްޗަށް ރައްޔިތުންގެ މެދުގައި އޮތް އިތުބާރު ގެއްލި، ތަފާތު ޝަކުވާތަކެއް އުފެދިގެންދިއުމުގެ ޖާގަ ލިބިގެންދާނެކަމެއް ކަމަށް ވިދާޅުވެފައެވެ.
މި ވާހަކަތަކާ ގުޅިގެން، ފުއާދުގެ ދިފާޢުގައި ވައްޑޭ ވިދާޅުވީ، ރާއްޖޭގެ ރައްޔިތުން އެކަކަށް އެންމެ އިތުބާރު ކުރާ މީހަކަށް ފުއާދު ވާނެކަމަށާއި، ސަރުކާރަށް ތާއީދުކުރައްވާ ފަރާތްތައް މިހާރު ޢަމަލުކުރައްވަމުންދާ ގޮތަށް ޢަމަލުކުރަނީ ކުރިއަށް އޮތް ރިޔާސީ އިންތިޚާބުން ބަލިވާނެކަން ޔަޤީންވުމުންކަމަށެވެ.
އޭނާ ވިދާޅުވީ، ސަރުކާރުން ކުރިއަށް އޮތް ރިޔާސީ އިންތިހާބަށް ނުފޫޒު ފޯރުވުމަށްޓަކައި އެންމެ ފުރަތަމަވެސް ވިސްނާނީ ފުއާދު ބޭރުކޮށްލުމަށް ކަމަށާއި، އޭނާ ބޭރު ކުރުމަށްފަހު، އެ މަޤާމަށް އައްޔަނު ކުރާނީ ރައީސް ސާލިޙުގެ ޅިޔަނެއް ކަމަށެވެ.
