ރިޔާސީ އިންތިޚާބު 2023: ވޯޓާސް ލިސްޓަށް 185 ޝަކުވާ
އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުލާ މީހުންގެ ލިސްޓަށް އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލުމުން، މިހައިތަނަށް 185 ޝަކުވާ އިލެކްޝަންސް ކޮމިޝަން(އީސީ)އަށް ލިބިފައިވާ ކަމަށް އެ ކޮމިޝަނުން ވިދާޅުވެއްޖެއެވެ.
އީސީން ވަނީ ޖޫން 22 ވާ ބުރާސްފަތި ދުވަހުގެ ނިޔަލަށް ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވައިލައިފައެވެ. އެ ކޮމިޝަނުން ޖޫން 21 ވަނަ ދުވަހު އާންމުކޮށްފައިވާ ތަފާސްހިސާބުތަކަށް ބަލާއިރު އެންމެ ގިނައިން ޝަކުވާ ހުށަހަޅާފައިވަނީ މަރުވެފައިވާ މީހުންގެ ނަން ލިސްޓުގައި ހިމެނިގެންނެވެ.
އޭގެ 148 ޝަކުވާ ހުށަހަޅާފައިވެއެވެ. އެއަށްފަހު ދެން އެންމެ ގިނައިން ޝަކުވާ ހުށަހަޅާފައިވަނީ އެޑްރެސް ބަދަލުވެގެންނެވެ. އެޑްރެސް ބަދަލުވެގެން 21 ޝަކުވާއެއް ހުށަހަޅާފައިވެއެވެ.
ލިސްޓުގައި ނަން ނެތިގެން 10 ޝަކުވާ ހުށަހަޅާފައިވާއިރު، ދާއިރާ ބަދަލުވެގެން ތިން ޝަކުވާ އަދި ނަން ބަދަލުވެގެން ދެ ޝަކުވާ އަދި އައިޑީ ކާޑު ބަދަލުވެގެން އެއް ޝަކުވާ ހުށަހަޅާފައިވެއެވެ.
