މިއަދުގެ މަޖިލިސް ބޭއްވީ ނަމަކަށް: ރޮޒައިނާ
މިއަދު މަޖިލީހުގެ ޖަލްސާ ބާއްވަނީ އެއްވެސް ކަމެއް ނުކުރެވޭ ގޮތަށް ހަމައެކަނި ނަމެއްގައި ކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
މަޖިލީހުގެ ރިޔާސަތުގައި އިންނަވަން އުޒުރުވެރިވެ ވަޑައިގެންފައިވާ ކަމަށްބުނެ, މިދިޔަ ދުވަސްތަކުގައި މަޖިލީހުގެ ރިޔާސަތު ރައީސް ނަޝީދު ބަލަހައްޓަވާފައެއް ނުވެއެވެ. ނަމަވެސް މިއަދުގެ ޖަލްސާގެ ރިޔާސަތުގައި އިންނެވީ ރައީސް ނަޝީދެވެ.
ޖަލްސާއާ މެދު ކަންބޮޑުވުން ފާޅުކުރައްވައި އޭނަ ކުރެއްވި ޓްވީޓެއްގައި ވިދާޅުވީ މިއަދުގެ ޖަލްސާ އަކީ ޖަލްސާއެއް ބޭއްވީމޭ ބުނަން ކުރާ ކަމެއް ކަމަށެވެ.
ރޮޒައިނާ ވިދާޅުވީ ކޮމިޓީތައް އެކުލަވާލަން ފުރުސަތު ނުދިން އިރު، މަޖިލިސް ޗުއްޓީ އަށް ދާން އުޅެނީ އިލެކްޝަން ކޮމިޝަން (އީސީ) އަށް މެމްބަރު ވެސް ނުނަގައި ކަމަށެވެ.
"ފަސް މެމްބަރުން ނެތި ރިޔާސީ އިންތިހާބަކަށް ގޮސް މައްސަލަތައް ނިންމުމުގައި އެތައް ދަތިތަކެއް ދިމާވާނެ." ރޮޒޭ ވިދާޅުވީ މިއަދުގެ ޖަލްސާ ބާއްވާފައިވަނީ ނަމަކަށް ކަމަށެވެ. "ސިލުވާނެ އެއްވެސް ކަމެއް ނެތް."
އެމްޑީޕީން ވަނީ މަޖިލީހަށް މިހާރު ހުށަހެޅިފައި ހުރި މައްސަލަތައް ނިމެންދެން ދައުރު ދަންމައިލަން ހުށަހަޅައިފައެވެ. ނަމަވެސް މަޖިލީހުގެ މިދައުރު ނިންމާލާފައިވަނީ އެކަން ބަލައިނުގަނެވެ.
