ދާއިމީ ވޯޓަރސް ލިސްޓަށް ޖުމްލަ 551 ޝަކުވާ
ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ދާއިމީ ވޯޓަރސް ލިސްޓަށް ޝަކުވާ ހުށަހެޅުމުގެ މުއްދަތު ހަމަވިއިރު 551 ޝަކުވާ ހުށަހަޅާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަންސް ކޮމިޝަނުން ޝަކުވާ ހުށަހެޅުމަށް ހުލުވާފައިވަނީ މިމަހުގެ 11 އިން 22 އަށެވެ. މި މުއްދަތުގެ ތެރޭގައި ޖުމްލަ 551 ޝަކުވާއެއް ލިބިފައިވާއިރު މީގެ ތެރޭގައި މައިގަނޑު 6 ވައްތަރެއްގެ ޝަކުވާ ހިމެނެއެވެ.
އެ ޝަކުވާތަކުގެ ތެރޭގައި ނިޔާވެފައިވާ މީހުންގެ ނަން އޮތުމުން 465 ޝަކުވާ، އެޑްރެސް ބަދަލުވެފައިވާތީ 58 ޝަކުވާ، ލިސްޓުގައި ނަން ނެތުމުން 19 ޝަކުވާ، ނަން ބަދަލުވެގެން 5 ޝަކުވާ، ދާއިރާ ބަދަލުވެގެން 3 ޝަކުވާ، އައިޑީކާޑު ބަދަލުވެގެން 1 ޝަކުވާ ހިމެނެއެވެ.
ރިޔާސީ އިންތިޚާބު ބޭއްވެވުމަށް ނިންމަވާފައިވަނީ ސެޕްޓެމްބަރުމަހުގެ 9 ވަނަ ދުވަހުއެެވެ. އަދި އިންތިޚާބުގެ 2 ވަނަ ބުރެއް ބާއްވަވަން ޖެހިއްޖެނަމަ ސެޕްޓެމްބަރު 30ގައި 2 ވަނަ ބުރުގެ ވޯޓުލުން ބޭއްވެވުމަށްވެސް އިލެކްޝަންސް ކޮމިޝަނުން ވަނީ ނިންމަވާފައެވެ. ރިޔާސީ އިންތިޚާބުގެ މައި މަރުކަޒަކަށް ކަނޑައަޅާފައި ވަނީ ދަރުބާރުގެއެވެ.
