ރައީސް ޔާމީންގެ ޝަރީޢަތް ފުލުފުލުގައި ތާވަލު ކުރަނީ، ހައިކޯޓު މައްސަލަ ކާމިޔާބުވާނެތީ: ސައީދު
އިދިކޮޅު ލީޑަރު، ރައީސް ޔާމީންގެ ޝަރީޢަތްތައް ފުލުފުލުގައި ތާވަލު ކުރީ، ހައިކޯޓުގައި އިސްތިއުނާފު ކޮށްފައިވާ މައްސަލަ އެމަނިކުފާނަށް ކާމިޔާބު ކުރެވޭނެތީ ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސަޢީދު ވިދާޅުވެއްޖެއެވެ.
ވ.އާރަށް ކުއްޔަށް ދޫކުރުމުގެ މުއާމަލާތާ ގުޅޭ މައްސަލައިގައި ރައީސް ޔާމީނަށް 11 އަހަރުގެ ޖަލު ޙުކުމެއް އިއްވައިފައިވާއިރު، އެ ޙުކުމްގެ އިސްތިއުނާފު އަޑުއެހުންތައް ހައިކޯޓުގައި ވަނީ ފަށައިފައެވެ. އަދި ރ.ފުއްގިރި މައްސަލައިގެ އަޑުއެހުންތައް، ކްރިމިނަލް ކޯޓުގައި ވަނީ ފުލުފުލުގައި ތާވަލު ކޮށްފައެވެ.
"ރައީސް އިބްރާހީމްގެ އެންގުމަށް، ސީދާ އެންގުމަށް، ރައީީސް ޔާމީން ހައި ކޯޓުން ސަލާމަތްވެވަޑައިގަންނަވާތީ، އެމަނިކުފާނުގެ މައުސޫމް ކަމާއެކު ސަލާމަތްވެވަޑައިގަންނަވާނެތީ، ދަށު ކޯޓުގައި މިއޮށް އަތުރައިލީ، ތަރުތީބުކޮށް ކޮންމެ ދުވަހެއްގައި އަޑުއެހުން އޮންނަ ގޮތަށް." ސައީދު ވިދާޅުވިއެވެ.
އޭނާ ވަނީ މި ފެށޭ ޖުލައި މަހުގެ 2، 4، 6، 9، 11 އަދި 13 ވަނަ ދުވަހު ވެސް، ފުއްގިރި މައްސަލައިގެ އަޑުއެހުންތައް ކްރިމިނަލް ކޯޓުގައި ތާވަލުކޮށްފައިވާކަން ފާހަގަކުރައްވައިފައެވެ.
އޭނާ ވިދާޅުވީ 13 ވަނަ ދުވަހުގެ ފަހުން އަންނަނީ ހަފްތާ ބަންދު ކަމަށާއި، 16 ވަނަ ދުވަހު، ހައި ކޯޓުގެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ އެއްބޭފުޅަކު ޗުއްޓީއަށް ފޮނުވައިލާނެ ކަމަށެވެ.
"އެހެންވީމަ، 16އިން އަނެއްކާ މިދާ ގޮތަށް ގޮސް، 25އާ ހަމައަށް، ޖުލައި 26 އަކީ ބަންދު ދުވަހެއްކަން އެނގިވަޑައިގަންނަވާނެ، އެހެންވީމަ މި އުޅެނީ، މަކަރާ ހީލަތާ އަނިޔާވެރިކަން އިންތިހާއަށް، އެއް ގިޔަރު، ހަ ގިޔަރު ކުރިއަށް ޖައްސާލާފަ، ރައީީީސް ޔާމީންގެ ދުވަސް ދުއްވާލަން."
ސައީދު އިތުރަށް ވިދާޅުވީ، ކާމިޔާބު ވެރިކަމެއް ކުރެއްވުމަށް ފަހުގައި، ރައީީސް ޔާމީން ފަދައިން، ސަރުކާރުގެ އަނިޔާއަށް ކެތްކުރެއްވި ވެރިޔަކު، ފަހުގެ ތާރީޚު ދެކެފައި ނުވާ ކަމަށެވެ.
Ads by STO
