ހުށަހެޅީ 551 ޝަކުވާ، އާ ލިސްޓު މި ހަފްތާތެރޭ ގެޒެޓް ކުރާނެ
ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ދާއިމީ ވޯޓަރސް ލިސްޓަށް 551 ޝަކުވާ ހުށަހަޅާފައިވާ ކަމަށާއި އާ ލިސްޓު މި ހަފްތާތެރޭ ގެޒެޓް ކުރާނެ ކަމަށް އިލެކްޝަން ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވެއްޖެއެވެ.
ހަބީބް ވިދާޅުވީ ވޯޓުލާމީހުންގެ ލިސްޓަކީ ސިއްރުން ގެންގުޅޭ އެއްޗެއްނޫން ކަމަށާއި، މަޖިލިސް މެމްބަރުން ހެއްދެވި ގާނޫނުގައި އޮންނަގޮތަށް، ލިސްޓު ގެޒެޓުކޮށް ޕާޓީތަކަށް ލިސްޓު ފޮނުވައި، ހުރިހާ ރަށެއްގައި ލިސްޓު ޢާންމުކޮށް ޝަކުވާއަށް ހުޅުވާލައި، ޝަކުވާ އާ ގުޅިގެން އަންނަ ބަދަލުވެސް ގެޒެޓު ކުރަމުންދާނެ ކަމަށެވެ.
އަދި ޝަކުވާގެ މުއްދަތުގައި އެކޮމިޝަނަށް ހުށަހެޅުނު ހުރިހާ ޝަކުވާއަކަށް މިހާރު ޖަވާބުދީ ނިމިފައިވާކަމަށާއި ލިބުނު ޝަކުވާތަކާ ގުޅިގެން، ވޯޓުލާ މީހުންގެ ލިސްޓަށް އަންނާނެ ބަދަލު މި ހަފްތާތެރޭގައި ގެޒެޓް ކުރެވޭނެކަމަށް ހަބީބް ވިދާޅުވިއެވެ.
ވޯޓާސް ލިސްޓަށް ހުށަހެޅި ޝަކުވާތަކުގެ ތެރެއިން 465 ޝަކުވާއަކީ މަރުތަކާ ގުޅިފައިވާ ޝަކުވާއެވެ. އަދި ދާއިމީ އެޑްރެސް ބަދަލުވެގެން 58 ޝަކުވާ ލިބުނުއިރު ލިސްޓުގައި ނަން ނެތިގެން ހުށަހަޅާފައިވަނީ 19 ޝަކުވާއެވެ.
