ރާއްޖޭގައި ލަގްޒަރީ ފްލޯޓިން ވިލާތަކެއް ހަދަން އެއްބަސްވުމެއްގައި ސޮއިކޮށްފި
ރާއްޖޭގެ ލަގްޒަރީ ރިއަލް އެސްޓޭޓަށް އިންގިލާބީ ބަދަލެއް ގެނައުމަށް ރާއްޖޭގެ ހޮޓެލްސް އެންޑް ރިސޯޓްސް އިންވެސްޓްމެންޓް މޯލްޑިވްސް (އެޗްއޭއާރުއައިއެމް) އާއި ފިންލެންޑުގެ މެޔާ ފްލޯޓިން ސޮލިއުޝަންސް އިން އެއްބަސްވުމެއްގައި ސޮއިކޮށްފިއެވެ.
ރާއްޖޭގައި ފްލޯޓިން ރިއަލް އެސްޓޭޓް ވޯޓާ ވިލާތަކެއް ހަދަން އެއްބަސްވުމެއްގައި ސޮއިކުރުމަށް އިއްޔެ ބޭއްވި ރަސްމިއްޔާތުގައި އެޗްއޭއާރުއައިއެމްގެ ފަރާތުން ސޮއިކުރެއްވީ އެ ކުންފުނީގެ ޗއާމަން މުޙައްމަދު ޢަލީ ޖަނާޙު (ޖަނާ) އަދި މެޔާ ފްލޯޓިން ސޮލިއުޝަންސްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޑިރެކްޓަރު މިކޯ ލަޓޮނެންއެވެ.
އެޗްއޭއާރުއައިއެމް އާއި މެޔާ ފްލޯޓިން ސޮލިއުޝަންސް ގުޅިގެން ކުރިއަށްގެންދާ މި މަޝްރޫޢުގައި ކ.ވިލިވަރުގައި ފްލޯޓިން ރިއަލް އެސްޓޭޓް ވޯޓާ ވިލާގެ ސިލްސިލާއެއް ތަރައްގީކުރާއިރު، މި މި މަޝްރޫޢުގެ ދަށުން ރާއްޖޭގެ އެކި ސަރަޙައްދުތަކުގައި ފްލޯޓިންގ ވޯޓަރ ވިލާ އެޅުމަށް ވަނީ ހަމަޖެހިފައެވެ.
މި މަޝްރޫޢުގެ ފުރަތަމަ ފިޔަވަހީގެ ދަށުން މާލެ އަތޮޅު ދެކުނުބުރީ ވިލިވަރުގައި 13 ލަގްޒަރީ އޯވަރ ވޯޓަރ ވިލާ އެއް ޤާއިމުކުރުމަށް ވަނީ ހަމަޖެހިފައިވާއިރު، މި ވިލާތަކަކީ ޒަމާނީ ޓެކްނޮލޮޖީ ބޭނުންކޮށްގެން، ހާއްސަކޮށް 6އެފް ޕްރިންޓިން ބޭނުންކޮށްގެން ތަރައްގީކުރާ ވިލާތަކަކެކެވެ. އަދި މި ވިލާތައް 2024 ވަނަ އަހަރާ ހިސާބަށް ނިންމާލެވޭނެ ކަމަށް އެޗްއޭއާރުއައިއެމުން ބުނެއެވެ.
މި ރަސްމިއްޔާތުގައި އެޗްއޭއާރުއައިއެމްގެ ޗެއަރމަން މުޙައްމަދު ޢަލީ ޖަނާޙް ދެއްކެވި ވާހަކަފުޅުގައި، ޢިމާރާތްކުރުމުގެ ސިނާޢަތަށް އިންޤިލާބީ ބަދަލުތަކެއް ގެނައުމަށާއި، ރާއްޖޭގެ ލަގްޒަރީ ރިއަލް އެސްޓޭޓް ދާއިރާ ކުރިއެރުވުމުގެ ފުރުޞަތު އެބައޮތްކަން ފާހަގަކުރެއްވިއެވެ. އަދި އިނޮވޭޓިވް ފައިނޭންސިންގ އެޕްރޯޗްގެ މައްޗަށް އަލިއަޅުއްވާލައްވައި، މި އެކްސްކްލޫސިވް ވިލާތައް ވިއްކުމަށް މަގުފަހިކުރުމުގެ ގޮތުން ޔޫރަޕިއަން އިންވެސްޓްމަންޓް ބޭންކުން ފައިނޭންސިން ހޯދުމުގެ ވިސްނުން ގެންގުޅުއްވާކަން ފާހަގަކުރެއްވިއެވެ.
ޖަނާޙް ވިދާޅުވީ، މި މަޝްރޫއުގެ އަގަކީ 200 މިލިއަން ޑޮލަރު (3 ބިލިއަން ރުފިޔާ) ކަމަށާއި އެ ވިލާތައް ވިއްކަން ހަމަޖެހިފައިވަނީ 20 މިލިއަން ޑޮލަރު (300 މިލިއަން ރުފިޔާ) އަށް ވުރެ މަތީ އަގުތަކެއްގައި ކަމަށެވެ.
މެޔާ ފްލޯޓިން ސޮލިއުޝަންސްގެ ޕާޓްނަރު އަދި ޑައިރެކްޓަރު މިކްކޯ ލަހްޓޮނެން ވަނީ މި ޕްރޮޖެކްޓްގެ ތަސައްވުރު ހިއްޞާކުރައްވައި، ފެނުގައި ރިއަލް އެސްޓޭޓް ޑިވެލޮޕްމަންޓްގައި ކޮލިޓީގެ އާ މިންގަނޑެއް ތައާރަފްކުރުމުގެ ވިސްނުން ގެންގުޅުއްވާކަން ހާމަކުރައްވާފައެވެ. އަދި ހޮސްޕިޓާލިޓީ ދާއިރާގައި ރާއްޖޭގެ ލީޑަރޝިޕް ފާހަގަކުރައްވައި، ދެމެހެއްޓެނިވި، ފެންވަރު ރަނގަޅު ކޮންސްޓްރަކްޝަން ސޮލިއުޝަންތަކެއް ފޯރުކޮށްދީ، ރާއްޖޭގެ އަގު ވަޒަންކުރައްވާނެ ކަމުގެ ޔަޤީންކަން ދެއްވިއެވެ.
ވިލިވަރު އައިލެންޑް ރިސޯޓް އެންޑް ސްޕާ އާއި ވެލާނާ އިންޓަނޭޝަނަލް އެއާޕޯޓާއި ދެމެދު އޮންނާނީ 30 މިނެޓުގެ ބޯޓު ދަތުރެއް ދުރުމިނަކަށްވާއިރު، މި ރިސޯޓް ގާއިމުކޮށް ފްލޯޓިން ވޯޓާ ވިލާތައް ތައާރަފްކުރުމުން ރާއްޖޭގައި ތަފާތު އަދި ލަގްޒަރީ ތަޖުރިބާއެއް ހޯދަން ބޭނުންވާ ޓޫރިސްޓުން ގެނައުމަށް މަގުފަހިވެގެންދާނެ ކަމަށް އެޗްއޭއާރުއައިއެމްއިން އުންމީދުކުރެއެވެ.
