އަމިއްލަ އެކައުންޓުތަކަށް ޖަމާވި 13 މިލިއަން ރުފިޔާއަކީ ޕެޓީ ކޭޝް: އާރުޑީސީ

އާރުޑީސީގެ މުވައްޒަފުންގެ އަމިއްލަ އެކައުންޓުތަކަށް ގިނަ އަދަދެއްގެ ފައިސާތަކެއް 2019 ވަނަ އަހަރުން ފެށިގެން ޖަމާފެވައިވާއިރު އެއީ ޕެޓީ ކޭޝް ކަމަށް އެކުންފުނީގެ ޗީފް ފައިނޭންސް އޮފިސަރު (ސީއެފްއޯ) ޔާސިރު ހަސަން ވިދާޅުވެއްޖެ އެވެ.

Ads by STELCO

އާރުޑީސީއާ ގުޅޭ ގޮތުން، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) އިން ހުށަހެޅި މައްސަލައެއް ފުލުހުން އަންނަނީ ބަލަމުންނެވެ. އަދި އެކަން ފުލުހުން ވަނީ މީޑިއާތަކަށް އަންގައިފަ އެވެ. އެނގިފައިވާ ގޮތުގައި 2019 ވަނަ އަހަރުން ފެށިގެން އާރުޑީސީގެ މުވައްޒަފުންގެ އަމިއްލަ އެކައުންޓުތަކަށް 13 މިލިއަނެއްހާ ރުފިޔާ ވަނީ ޖަމާވެފަ އެވެ.

ޔާސިރު ވިދާޅުވީ ފައިނޭންސް ޑިޕާޓްމެންޓުގެ ތިން މުވައްޒަފެއްގެ އެކައުންޓަށް ކޮންމެ މަހަކުވެސް ގިނަ އަދަދެއްގެ ފައިސާ ފޮނުވާ ކަމަށެވެ. އެކަން އެގޮތަށް ކުރަން ފެށީ އެކުންފުނިން ޕެޓީ ކޭޝް ގެންގުޅުމާއި ބެހޭ އާ އުސޫލެއްގެ ދަށުން ކަމަށާއި އެފައިސާ ބޭނުން ކުރަނީ ކުންފުނީގެ ކަންކަމުގައި ކަމަށް ޔާސިރު ވިދާޅުވި އެވެ.

އާރުޑީސީގެ ސީއެފްއޯ ޔާސިރު ހަސަން

ޔާސިރު ވިދާޅުވީ ޕެޓީ ކޭޝްގެ ގޮތުގައި ކޮންމެ މަހަކު އެވަރޭޖްކޮށް 4 ލައްކަ އާއި 5 ލައްކަ ރުފިޔާ އާއި ދެމެދުގެ އަދަދެއް ޖަމާކުރެ އެވެ. ކުރިން މި ފައިސާ ބޭނުންކުރަނީ އެކައުންޓަށް ޖަމާކުރުމުގެ ބަދަލުގައި ކޭޝްކޮށް ކަމަށާއި އެހެންނަމަވެސް އުސޫލަށް އައި ބަދަލާއިއެކު ފަހުން އެކައުންޓުތަކަށް ޖަމާކުރަން ފެށީ ކަމަށްވެސް އޭނާ ވިދާޅުވި އެވެ.

ޔާސިރު ވިދާޅުވި ގޮތުގައި މިގޮތަށް ޖަމާކުރާ ފައިސާއިން އާރުޑީސީގެ 25 ސައިޓާއި ޕްރޮޖެކްޓުތަކުގެ ކަންކަމަށް ބޭނުންވާ ފައިސާ ވަގުތުން ވަގުތަށް ހަމަޖައްސަ އެވެ. އެހެންނަމަވެސް އެފައިސާގެ ހުރިހާ ލިޔެކިޔުމެއް ހުންނާނެކަމަށްވެސް އޭނާ ވިދާޅުވި އެވެ.

ޔާސިރު މިފަދައިން ވިދާޅުވިއިރު އާރުޑީސީން ބޮޑެތި ފައިސާގެ އަދަދުތަކުން ކޮރަޕްޝަން ހިންގާކަމުގެ ތުހުމަތު އޮތީ ކުރެވިފަ އެވެ. މީގެ ކުރިން ތިން ފަހަރެއްގެ މަތިން އެކުންފުނީގެ ތިޖޫރީ ފަޅާލައިގެން ވަނީ ވައްކަންވެސް ކޮށްފަ އެވެ.