ހައްޖާޖީން ރާއްޖެ އަންނަން ފަށައިފި
ހައްޖުގެ މާތް އަޅުކަން އަދާކުރުމަށްފަހު ހަޖާޖީން މިއަދު މާލެ އަންނަން ފަށައިފިއެވެ.
މިއަދު ހައްޖާޖީންގެ ފުރަތަމަ ގްރޫޕް އައިސްފައިވާ އިރު، އޭގެ ތެރޭގައި ހިމެނެނީ އަލް މަނާސިކް ޕްރައިވެޓް ލިމިޓެޑްގެ ހަވާލުގައި ޙައްޖަށް ދިޔަ މީހުންނެވެ.
އިސްލާމިކް މިނިސްޓްރީން ވިދާޅުވީ ދިވެހި ހުރިހާ ހައްޖާޖީން އެނބުރި އައިސް ނިމޭނީ މި މަހުގެ 14 ގައި ކަމަށެވެ.
މިއަހަރު ރާއްޖެއަށް ލިބިފައިވަނީ 1000 ކޯޓާއެވެ. މީގެތެރެއިން ޙައްޖަށް ގެންދިޔުމުގެ ހުއްދަ ދޫކޮށްފައިވާ 3 ކުންފުނިން ކޮންމެ ކުންފުންޏަކަށް ދީފައިވަނީ 90 ފުރުޞަތެވެ. ދެންހުރި ފުރުޞަތުތައް ދިނީ ޙައްޖު ކޯޕަރޭޝަނަށެވެ.
ކޮވިޑް-19 ގެ ބަލިމަޑުކަން އައުމުގެ ކުރިން 2019 ވަނަ އަހަރު ސައުދީގައި 2.5 މިލިއަން މީހުން ވަނީ ހައްޖުގެ އަޅުކަން އަދާކޮށްފައެވެ.
ހައްޖުގެ އަޅުކަން ކުރަން ދިޔަ ފަސް މީހަކު ވަނީ މައްކާގައި ނިޔާވެފައެވެ. އެންމެ ފަހުން މީހަކު ނިޔާވެފައިވަނީ ބުރާސްފަތި ދުވަހުގެ ހެނދުނުއެވެ.
