ގިނަ ކެންޑިޑޭޓުން ކުރިމަތިލުމުން އިންތިހާބު ކާމިޔާބުކުރަން ވަރަށް ފަސޭހަވެއްޖެ: ރައީސް
ކުރިއަށް އޮތް ރިޔާސީ އިންތިހާބު ކާމިޔާބު ކުރަން ވަރަށް ފަސޭހަވެފައިވާ ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ޞާލިޙް ވިދާޅުވެއްޖެ އެވެ.
ދ. ކުޑަހުވަދޫގައި މިރޭ ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަދައްކަވަމުން ރައީސް ވިދާޅުވީ ރިޔާސީ އިންތިހާބަށް ރެކޯޑު އަދަދަކަށް ކެންޑިޑޭޓުން ކުރިމަތިލާފައިވާ ކަމަށާއި މިއީ 2008 ގެ ފަހުން ރިޔާސީ އިންތިހާބަށް އެންމެ ގިނަ ކެންޑިޑޭޓުން ކުރިމަތިލީ ފުރަތަމަ ފަހަރު ކަމަށެވެ. މިފަހަރުގެ އިންތިހާބަށް ޖުމްލަ 8 ކެންޑިޑޭޓަކު ވަނީ ކުރިމަތިލައިފަ އެވެ.
"އަޅުގަނޑުމެންނަށް މީގެއިން ވަރަށް ބޮޑަށް ފަސޭހަވެއްޖެ. ވަރަށް ބޮޑުތަން ފަސޭހަވެއްޖެ. އިރާދަކުރެއްވިއްޔާ ކުރިއަށް މިއޮތް ރިޔާސީ އިންތިހާބު އެއް ބުރުން އަޅުގަނޑުމެން ކާމިޔާބު ކުރާނީ ބޮޑުތަނުން،" ރައީސް ވިދާޅުވި އެވެ.
މިފަހަރުގެ ރިޔާސީ އިންތިހާބަށް ކުރިމަތިލާފައިވާ ބޭފުޅުންނަކީ ރައީސް ސޯލިހުގެ އިތުރުން އެމްއެންޕީގެ ކެންޑިޑޭޓް ދަނގެތި ދާއިރާގެ މެމްބަރު މުހައްމަދު ނާޒިމް، ދަ ޑިމޮކްރެޓްސްގެ ކެންޑިޑޭޓް، ހުޅުދޫ ދާއިރާގެ މެމްބަރު އިލްޔާސް ލަބީބު، ޖުމްހޫރީ ޕާޓީގެ ކެންޑިޑޭޓް، އެ ޕާޓީގެ ލީޑަރު ގާސިމް އިބްރާހީމް، ޕީއެންސީގެ ކެންޑިޑޭޓް، މާލޭ ސިޓީގެ މޭޔަރު ޑރ. މުހައްމަދު މުއިއްޒު، އަމިއްލަގޮތުން ވާދަކުރައްވާ އެމްއާރުއެމްގެ ރައީސް ފާރިސް މައުމޫން، އަމިއްލަގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރު އަދި އަމިއްލަގޮތުން ވާދަކުރައްވާ ޑިފެންސް މިނިސްޓްރީގެ ކުރީގެ ޑެޕިއުޓީ މިނިސްޓަރު ހަސަން ޒަމީލް އެވެ.
ރިޔާސީ އިންތިހާބު ބާއްވަން ނިންމާފައި ވަނީ އަންނަ މަހުގެ ނުވަވަނަ ދުވަހު އެވެ. ދެވަނަ ބުރެއް ބާއްވަން ޖެހިއްޖެ ނަމަ އިންތިހާބު ބޭއްވުމަށް އިލެކްޝަނުން ނިންމާފައި ވަނީ ސެޕްޓެމްބަރު 30ގަ އެވެ.
Ads by STO
