އެތައްހާސް ރައްޔިތުންގެ އާދޭހަކީ ރައީީސް ޔާމީންގެ މައްސަލަތައް ކޯޓުތަކުން އަވަސް ކޮށްދިނުން: ޝުޖާއު
ރާއްޖޭގެ އެތައް ހާސް ރައްޔިތުންގެ އާދޭހަކީ، ޕީޕީއެމް-ޕީއެންސީގެ ލީޑަރު، ރައީީސް ޔާމީން އަބްދުލްޤައްޔޫމްގެ މައްސަލަތައް ކޯޓުތަކުން އަވަސް ކޮށްދިނުން ކަމަށް ޕީއެންސީގެ ނައިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.
ރައީސް ޔާމީންގެ މައްޗަށް، ވ.އާރަށް މައްސަލައިގައި އިއްވައިފައިވާ ޙުކުމް ތަންފީޒު ކުރުން ފަސް ކުރުމުގެ އަމުރަކަށް ވަނީ އެދިވަޑައިގެންފައެވެ.
ހުޅުމާލެ ދާއިރާގެ ކައުންސިލަރު ޝުޖާއު މިއަދު ކުރެއްވި ޓްވީޓެއްގައި ވިދާޅުވީ، ނުހައްޤުން ޖަލުގެ ތޭރިތަކުގައި ދުވަސްތައް ހޭދަކުރައްވަމުން އެ ގެންދަވަނީ ދިވެހިންގެ ހިތްތަކުގެ ބާނީ ކަމަށާއި، އެތައްހާސް ރައްޔިތުންގެ އުއްމީދު ކަމަށެވެ.
"އާއިލާ އާއި ވަކިން ޖަލެެއްގައި މިގޮތައް އެކަނި އޮތުމަކީ ވަރަށްވެސް ހިތްދަތި ކަމެކެވެ. ދިވެހި ތާރީޚުގައި އިންސާފު ނުލިބި، އަނިޔާވެރިކަމުގައި ދުވަސްތައް ހޭދަކުރި ރަސްކަލެއް، ވަޒީރެއް، ވެރިއެއް މިނޫނީ ނުވެއެވެ."
އޭނާ އިތުރަށް ވިދާޅުވީ، ރައީސް ޔާމީން ޖަލަށްލީ މިއަހަރުގެ ރިޔާސީ އިންތިޚާބުގައި އެމަނިކުފާނު ވާދަކޮށްފާނެތީ ކަމަށާއި، މިހާރު އެފުރުޞަތުވެސް ގެއްލުވައިލައިފައިވާ ކަމަށެވެ.
"އަޅުގަނޑާއި އެތައްހާސް ރައީސް ޔާމީންގެ ސަޕޯޓަރުންގެ އާދޭހަކީ ރައީސް ޔާމީންގެ މައްސަލަތައް ކޯޓުތަކުން އަވަހަށް ނިންމުމެވެ."
ޝުޖާއު ވަނީ ކޯޓުތަކުން އިންސާފު ލިބެންދެން އެމަނިކުފާނު ގެއަށް ބަދަލުކޮށްދިނުމަށް ވެސް އެދިވަޑައިގެންފައެވެ. އަދި ވިދާޅުވީ، މިކަމާ ދިވެހި ދަޢުލަތުން ވިސްނަވާނެ ކަމަށް އުއްމީދު ކުރައްވާ ކަމަށެވެ.
