އައްސަދުގެ ކޮރަޕްޝަން މައްސަލަ ރިވިއުކުރަން އޭސީސީން ޕީޖީގައި އެދިއްޖެ
އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދުގެ މައްޗަށް ތުހުމަތު ކުރެވޭ ކޮރަޕްޝަނުގެ މައްސަލަ އަލުން ރިވިއުކުރަން އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލް އޮފީހުގައި އެދިއްޖެއެވެ.
ފިނޭންސް މިނިސްޓްރީގެ ސްޓޭޓް މިނިސްޓަރަކަށް އައްސަދު ހުންނެވި އިރު، ގުރުއާން ތަރުޖަމާ ޗާޕްކުރުމުގެ މަސައްކަތުގައި ކޮރަޕްޝަނުގެ އަމަލެއް ހިންގި ކަމަށް ތުހުމަތުކޮށް ކުރިން ވެސް ވަނީ މައްސަލަ ހުށަހަޅާފައެވެ. އެ މައްސަލައިގައި އައްސަދަށް ޖިނާއީ ދައުވާ ކުރި ނަމަވެސް މައްސަލަ ފަހުން ވަނީ އަނބުރާ ފޮނުވާލާފައެވެ.
"ސަން" އިން ރިޕޯޓު ކޮށްފައިވާ ގޮތުގައި ޕީޖީ އޮފީހުގެ އޮފިޝަލަކު އެމައްސަލަ ކޯޓަށް ހުށަހެޅުން ރިވިއުކުރަން އެދުނު ކަމަށް އެ ނޫހަށް ކަށަވަރު ކޮށްދީފައިވާ ކަމަށެވެ.
އޭނާ ވިދާޅުވީ އެމައްސަލަ ރިވިއުކުރުމަށް އޭސީސީއިން ޕީޖީގައި އެދުނީ ޖިނާއީ އިޖުރާއަތު ގަވާއިދާ ހިލާފަށް ކަމަށެވެ. އޮފިޝަލު ވިދާޅުވީ އެމައްސަލާގައި އާދިއްތަ ދުވަހު އޭސީސީއާ މަޝްވަރާކުރާނެ ކަމަށެވެ.
އޭސީސީން ބުނެފައިވާ ގޮތުގައި ގިނަ މައްސަލަތަކެއް މިވަގުތު ރިވިއު ކުރަމުން ދާ ކަމަށާއި އެއީ ކޮން މައްސަލަތަކެއް ކަން މީޑިއާއަށް ހަމާކުރަން ބޭނުން ނުވާ ކަމަށެވެ.
އައްސަދަކީ އެސެޓް ރިކަވަރީ ކޮމިޝަނުގެ ރައީސެވެ. އޭނާ ގެންދަވަނީ ދައުލަތުގެ އެތައް މުއައްސަސާއެއްގެ 300 އަށް ވުރެ ގިނަ ބަޔަކަށް ސީދާ ގޮތުންނާއިި ނުސީދާ ގޮތުން މަންފާ ލިބިފައިވާ އެމްއެމްޕީއާރުސީ ހިޔާނާތް ބައްލަވަމުންނެވެ. އެ ހިޔާނާތުން މަންފާ ލިބުނު މީހުންގެ ތެރޭގައި އޭސީސީގެ ކުރީގެ ބައެއް މެންބަރުންވެސް ހިމެނިފައި ވާ ކަމަށް ވަނީ މައުލޫމާތު ލިބިފައެވެ.
Ads by STO
