ތުޅާދޫގައި ސަރުކާރާއި ދެކޮޅަށް ބޭއްވި އެއްވުމަށް ހުރަސް އެޅުން ކުށްވެރިކޮށްފި
ބ.ތުޅާދޫގައި ސަރުކާރާ ދެކޮޅަށް އަޑު އުފުލި އުފުލުމަށް ފުލުހުން ހުރަސ އެޅުން އިދިކޮޅު ޕީޕީއެމް/ޕީއެންސީއިން ކުށްވެރި ކޮށްފިއެވެ.
އެ ކޯލިޝަނުން މިއަދު ނެރުނު ނޫސް ބަޔާނެއްގައި ވަނީ ތުޅާދޫގައި ބޭއްވި ޙަރަކާތަށް ސަރުކާރުން ހުރަސް އަޅާ ބައިވެރިންނަށް އަނިޔާކޮށް، ތަކެއްޗަށް ގެއްލުންދީ އެތައް ބަޔަކު ހައްޔަރުކުރުން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.
"މިއަދު ބ. ތުޅާދޫގައި ކުރިއަށް ގެންދެވުނު ސިޔާސީ ޙަރަކާތަކަށް ސަރުކާރުން ހުރަސްއެޅުމުގެ ގޮތުން ފުލުހުން ފޮނުވާ، ސުލްޙަވެރިކަމާއެކު ކުރިއަށް ގެންދެވުނު ޙަރަކާތަށް ހުރަސްއަޅާ، ތަކެއްޗަސް އެކިވަރުގެ ގެއްލުން ދިނުމުގެ އިތުރުން، އެތައް ރައްޔިތުންނަކަށް އަނިޔާކޮށް އަދި ބައެއް ބައިވެރިން ހައްޔަރުކުރުން އެންމެ ހަރުކަށި އިބާރާތުން ކުށްވެރިކުރަމެވެ." ބަޔާނުގައިވެއެވެ.
އިދިކޮޅުން ބުނީ އެ ސިޔާސީ ޙަރަކާތަކީ، މިކޯލިޝަންގެ ލީޑަރ އަދި ޕީޕީއެމްގެ ރައީސް ރައީސް ޔާމީން ޢަބްދުލްޤައްޔުމަށް ސިޔާސީ ނުފޫޒުން ޙައްޤު ނޫން ޙުކުމެއްޖަހައި، އެމަނިކުފާނަށް ސަރުކާރުން ވަމުންދާ އަނިޔާއާއި ދެކޮޅަ އަޑުއުފުލާ އެމަނިކުފާނު މިނިވަން ކުރުމަށް ގޮވާލާ ސުލްޙަވެރިކަމާއެކު ތުޅާދޫގައި ކުރިއަށް ގެންދެވުނު ޙަރަކާތެއް ކަމަށެވެ.
ސަރުކާރާއި ދެކޮޅަށް އަޑު އުފުލާ ފަރާތްތަކަށް އަނިޔާވެރިވެ އެމީހުން ގެންގުޅޭ ތަކެއްޗަށް ގެއްލުންދީ އެވެސް ކުށެއްނެތި ހައްޔަރުކުރުމަކީ މިކޯލިޝަނުން ބަލައިގަންނަ ކަމެއް ނޫން ކަމަށް ބުނެ، އެއީ ޑިމޮކްރަސީގެ ރޫޙާއިވެސް ޚިލާފަށް ހިންގާ ޖަރީމާއެއްކަމުގައި ދެކޭ ކަމަށް އިދިކޮޅުން ބުނެއެވެ.
"އެހެންކަމުން ޙައްޔަރުކޮށްފައިވާ އެންމެން މިހާރުން މިހާރަށް ދޫކޮށްލުމަށާއި، ޙަރަކާތަށް ހުރަސް އެޅުމުގައި، ފުލުހުން ޙާލަތާއި ނުބައްދަލު ބާރުގެ ބޭނުންކުރުމުގެ ސަބަބުން ގެއްލުން ލިބުނު ތަކެތީގެ ބަދަލު ދިނުމަށް ގޮވާލަމެވެ."
ހަމައެއާއެކު ޣައިރު ޤާނޫނީ ޢަމުރުތަކަށް ކިޔަމަން ނުވަމަށްވެސް ފުލުހުންނަށް އިދިކޮޅުގެ ބަޔާނުގައި ނަސޭޙަތްތެރިވެފައިވެއެވެ.
Ads by STO
