ކެންޑިޑޭޓުން ވޯޓާސް ލިސްޓުގައި މާދަމާއިން ފެށިގެން ސޮއިކުރަން ފަށަނީ
އަންނަ މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ވޯޓާސް ލިސްޓުގައި މާދަމާއިން ފެށިގެން އިންތިޚާބުގައި ވާދަކުރައްވާ ކެންޑިޑޭޓުންނަށް ސޮއިކުރަން ފުރުސަތު ހުޅުވާލައްވާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެެއެވެ.
އިލެކްޝަންސް ކޮމިޝަންގެ ނައިބް ރައީސް އިސްމާއީލް ހަބީބް ވިދާޅުވީ ވޯޓާސް ލިސްޓުގައި އިލެކްޝަންސް ކޮމިޝަނުން މިހާރު ސޮއި ކުރައްވަމުންގެންދަވާ ކަމަށެވެ. އެމަސައްކަތް މިރޭގެ ނިޔަލަށް ނިންމަވާލެއްވުމަށްފަހު މާދަމާއިން ފެށިގެން ކެންޑިޑޭޓުން ލިސްޓުގައި ސޮއިކުރުމަށް ފުރުޞަތު ދެއްވާނެކަމަށް ވިދާޅުވިއެވެ.
ހަބީބް ވިދާޅުވީ ކެންޑިޑޭޓުންނަށް ލިސްޓުގައި ސޮއިކުރައްވަން ވަޑައިނުގެންނެވޭނަމަ، ކެންޑިޑޭޓެއްގެ ސިޓީއަކާއެކު ހުށަހެޅުއްވުމުން އެކެންޑިޑޭޓެއްގެ ފަރާތުން ހުށަހަޅުއްވާ މަންދޫބުންނަށް ސޮއިކުރުމުގެ ފުރުސަތު ދެއްވާނެކަމަށެވެ.
ކެންޑިޑޭޓުންނަށް ލިސްޓުގައި ސޮއިކުރެއްވުމަށް ފުރުސަތު ދެއްވާނީ މާދަމާއިން ފެށިގެން މިމަހުގެ 27 ވަނަ ދުވަހުގެ ނިޔަލަށެވެ.
