ކުނބުރުދޫގެ ބިން ހިއްކައި ގޯތި ދޭނަން: މުއިއްޒު
އދ. ކުނބުރުދޫގެ ބިން ހިއްކައި އެތަނުން ގޯތި ދޭނެ ކަމަށް ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ރިޔާސީ ކެމްޕޭނަށް މިއަދު ކުނބުރުދުއަށް ވަޑައިގެން އެރަށުގައި ބޭއްވި ކެމްޕޭނު ޖަލްސާގައި ވާހަކަދައްކަވަމުންނެވެ.
މުއިއްޒު ވިދާޅުވީ ކުނބުރުދޫގައި މިހާރު އޮތް ބިމުގެ ޖާގައިގެ ދަތިކަން ވަރަށް ބޮޑު ކަމަށާއި ރަށުގެ ރައްޔިތުން އެންމެ ބޮޑަށް އެދެނީ ވެސް އެ ރަށުގެ ބިން ހިއްކައި ދިނުމަށް ކަމަށެވެ.
ރިޔާސީ އިންތިޚާބުގެ ދެވަނަ ބުރު ކާމިޔާބު ކުރެވިއްޖެނަމަ ކުނބުރުދޫ ފަޅުތެރެއިން ހިއްކެން އޮތް އެންމެ ބޮޑު މިނަކަށް ބިން ހިއްކައިދެއްވާނެ ކަމަށް ވެސް މުއިއްޒު ވިދާޅުވިއެވެ.
މިގޮތުން އެންވަޔަރުމެންޓް އެސެސްމެންޓް އިމްޕެކްޓު ރިޕޯޓުން ފަޅު ހިއްކުމަށް ޖާގަ ދޭ އެންމެ ބޮޑު މިނަކަށް ކުނބުރުދޫ ބިން ހިއްކައިދޭނެ ކަމަށް މުއިއްޒު ވިދާޅުވެފައި ވެއެވެ.
މީގެ އިތުރުން ބިން ހިއްކާ ނިމުމުން އެތަނުން ގޯތި ދޫކޮށް ޒުވާނުންނަށް ބޭނުންވާ ސްޕޯޓްސް ފެސިލިޓީސްތައް ހަދައިދީ ކުނބުރުދޫ ސްކޫލާއި ހެލްތު ސެންޓަރުގެ ޖާގަ އިތުރުކޮށްދޭނެ ކަމަށް ވެސް މުއިއްޒު ވިދާޅުވިއެވެ.
ހަމަ އެހެންމެ މި ފަސް އަހަރު ތެރޭގައި ރާއްޖޭގެ ތަރައްޤީ ވަނީ ފަހަތަށް ސޮއްސާލާފައި ކަމަށާއި މުއިއްޒުގެ ސަރުކާރެއްގައި ބާރު މިނުގައި ރާއްޖެއަށް ތަރައްޤީ ގެނެސްދެއްވާނެ ކަމަށް މުއިއްޒު ވަނީ ވިދާޅުވެފައެވެ.
