ޑިމޮކްރެޓުންވެސް އެއްވެސް ކެންޑިޑޭޓަކަށް ތާއީދު ނުކުރަން ނިންމައިފި
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިސްވެ އުފެއްދެވި ދަ ޑިމޮކްރެޓްސް އިންވެސް އެއްވެސް ރިޔާސީ ކެންޑިޑޭޓަކަށް ތާއީދު ނުކުރަން ނިންމައިފިއެވެ.
ރިޔާސީ އިންތިޚާބުގައި ދެވަނަ ބުރުގައި ވާދަކުރައްވާ ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒާއި، އެމްޑީޕީގެ ކެންޑިޑޭޓް ރައީސް އިބްރާހީމް މުޙައްމަދު ޞާލިޙަށް ޑިމޮކްރެޓްސްއިން ވަނީ އެޕާޓިން ހުށައެޅި ކަންކަމަށް އެއްބަސްވުމަށް މިއަދާ ހަމައަށް ސުންގަޑި ދީފަައެވެ.
މަޢުލޫމާތު ލިބިފައިވާ ގޮތުގައި ދަ ޑިމޮކްރެޓްސް އިން ވަނީ އެއްވެސް ރިޔާސީ ކެންޑިޑޭޓަކަށް ތާއީދު ނުކުރުމަށް ނިިންމާފައެވެ.
މިކަމާއި ގުޅޭގޮތުން "ދެން" އަށް މަޢުލޫމާތު ދެމުން ޑިމޮކްރެޓްސްއިން ވިދާޅުވީ ފާސްކުރި ގަރާރުގެ މުއްދަތު އަދި ހަމަނުވާ ކަމަށެވެ.
ނިޒާމު ބަދަލުކުރުމާ މެދު ފެންނަ ނުފެންނަ ވޯޓެއް ނަގަން ގޮވާލައި ރިޔާސީ އިންތިހާބުގައި އެ ޕާޓީން ވާދަކުރެއްވި ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ މަޖިލީހަށް ގަރާރެއް ހުށަހަޅާފައެވެ.
ރިޔާސީ އިންތިޚާބުގެ ދެވަނަ ބުރުގައި އަމަލުކުރާނެ ވަކި ގޮތެއް ނިންމުމަށްޓަކައި ޑިމޮކްރެޓްސްގެ މެންބަރުންގެ މެދުގައި މަޝްވަރާތައް ކުރިއަށް ގެންގޮސް، ބޭއްވި ކައުންސިލް ބައްދަލުވުމެއްގައި އެ ޕާޓީއަށް ނިސްބަތްވާ ގިނަ މެންބަރުންތަކެއް ވަނީ ރައީސް ޞާލިޙް ނޫން ގޮތެއް ހޯދަން ޖެހޭކަމަށް ބުނެފައެވެ.
މީގެ އިތުރުން ޑިމޮކްރެޓްސްއިން ވަނީ އެއްބަސްވުމެއްގައި ސޮއިކުރަން ބޭނުންނުވުމުގެ ސަބަބުން ޑިމޮކްރެޓްސްއިން ޕީޕީއެމާ އެކު ކުރި މަޝްވަރާތައް ހުއްޓާފައިވާ ކަމަށް ވެސް ވިދާޅުވެފައެވެ.
