އުތުރުތިލަފަޅު ބަލައިލުމުގެ ފުރުސަތު ދިނީ، ސަރުކާރުން ބޭނުންވާ ބައެއް މީޑިއާތަކަށް އެކަނި!

އުތުރު ތިލަފަޅުގައި، އަވަށްޓެރި އިންޑިއާގެ އެހީގައި އަޅަމުންދާ އެމްއެންޑީއެފްގެ "އެކަތަ ބަނދަރު" ގެ މަޝްރޫއުގެ މަސައްކަތް ކުރިއަށް ގެންދާ ގޮތް ބެލުމަށް ރައީސް އިބްރާހީމް މުހައްމަދު ޞާލިހުގެ ސަރުކާރުން ވަކި މީޑިއާތަކަށް ދިނުމުން، ފާޑުކިޔުން އަމާޒުވެއްޖެއެވެ.

Ads by Hajj Corporation

ފަނަރަ ހެކްޓަރުގެ ބިން ހިއްކައިގެން މިދިޔަ ޖެނުއަރީ މަހު ތަރައްގީ ކުރަން ފެށި އުތުރުތިލަފަޅުން، ގޯތި ދޭން ނިންމާފައިވާ ކަމަށް މިމަހު 23 ވަނަ ދުވަހުގެރޭ އެމްޑީޕީގެ ސޯސަން ޖަގަހައިގައި އްވި ޖަލްސާއެއްގައި ވާހަކަފުޅު ދައްކަވަމުން ރައީސް ޞާލިޙު ވަނީ އިޢުލާނު ކުރައްވާފައެވެ.

އުތުރު ތިލަފަޅުން ގޯތި ދޭނީ ސިފައިންނަަށް ކަނޑައަޅާފައިވާ ބައިގެ ފަހަތުން 251 ހެކްޓަރުގެ ބިން ހިއްކައިގެން ކަމަށް ސަރުކާރުން ވަނީ ބުނެފައެވެ.

ރައީސް ޞާލިޙު މިހެން ވިދާޅުވުމާއި ގުޅިގެން ބައެއް ނޫސްވެރިން އޭގެ އަނެއް ދުވަހު، އުތުރު ތިލަފަޅުން ގޯތި ދޭ ސަރަހައްދު ބެލުމަށް ދިޔުމުން ހުއްދަނެތި ދިޔަ ކަމަށް ބުނެ އެތަނުގައި ހުރި އޮފިޝަލް ވަނީ އެ ނޫސްވެރިން އެތަނުން ފޮނުވާލާފައެވެ. އަދި ނޫސްވެރިންގެ ޢަމަލު ކުށްވެރިކޮށް، ޤައުމީ ދިފާއީ ބާރުން ބަޔާނެއް ނެރެ، އެ ބަޔާނުގައި ވަނީ އުތުރުތިލަފަޅު ބަލައިލަން ނޫޫސްވެރިންނަށް ދަޢުވަތު ދިން ކަމަށް ބުނެފައެވެ. އެ ދަޢުވަތު، މި ނޫހަށް ވެސް ލިބިފައިނުވާއިރު، ހަމައެކަނި ވަކި ބަޔަކަށް ދަޢުވަތު ދިންކަން އެހެން މީޑިއާތަކުން ވެސް އަންނަނީ ފާހަގަކުރަމުންނެވެ.

އުތުރުތިލަފަޅަށް ދިވެހި ސިފައިންގެ ބާރު ނުހިނގާ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް، ޑރ.މުޙައްމަދު މުޢިއްޒު ވަނީ ވިދާޅުވެފައެވެ. ސިފައިންނަށް އެތަނަށް އެރުން މަނާކަން، ސިފައިންގެ ސީނިއަރ ބޭކަލަކު ނަން ނުޖެހުމަށް ޝަރުތުކޮށް، މި ނޫހަށް ކަށަވަރު ކޮށްދިނެވެ.