ވޯޓުލުމުގެ ރަސްމީ ވަގުތު ހަމަވެ، ފޮށިތައް ބަންދު ކުރަން ފަށައިފި

ރިޔާސީ އިންތިޚާބުގައި މިއަދު ކުރިއަށްދާ ދެވަނަ ބުރުގެ ވޯޓުލުމުގެ ރަސްމީ ވަގުތު ހަމަވެ، ވޯޓު ފޮށިތައް ބަންދު ކުރަން ފަށައިފިއެވެ.

Ads by Sosun Fihaara

ވޯޓުލާން ވަގުތު ދީފައި ވަނީ ހަވީރު 5:00އާއި ހަމައަށެވެ. އެއަށްވުރެ ވަގުތު އިތުރު ނުކުރަން ވަނީ ނިންމައިފައެވެ.

އިލެކްޝަންސް ކޮމިޝަން(އީސީ) އިން ވިދާޅުވީ، މިއަދު ހަތަރެއް ޖެހުމާއި ހަމައަށް 78.32 އިންސައްތަ މީހުން ވޯޓުލާފައިވާ ކަމަށެވެ.

އެއީ 221،496 ‏‏‏މީހުންނެވެ. އޭގެތެރޭގައި ހިމެނެނީ 111،273 އަންހެނުންނާއި، 110،223 ފިރިހެނުންނެވެ. އަދި 61،308 މީހުން ވޯޓުލައިފައެއް ނުވެއެވެ.

މި ފަހަރުގެ އިންތިޚާބުގައި ވޯޓުލުމުގެ ޙައްޤު ލިބިފައިވާ 282،804 މީހުން އެބަތިއްބެވެ.