ބަރުލަމާނީ ބަހުސްކުރަން އެމްޑީޕީގެ ގައުމީ މަޖިލިސް ޖަލްސާ މިރޭ ބާއްވަނީ
ރާއްޖޭގައި ވެރިކަންކުރުމުގެ ނިޒާމު ބަދަލުކުރުމާއި ގުޅޭގޮތުން މޯލްޑިވްސް ޑިމޮކްރަޓިކް ޕާޓީ (އެމްޑީޕީ) އިން ކުރިއަށްދާނެ ގޮތެއް މިރޭ ކަނޑައެޅުމަށް އެޕާޓިން ނިންމައިފިއެވެ.
އެމްޑީޕީގެ ޗެއާޕާސަންގެ ނައިބު، ރައީސް އޮފީހުގެ މިނިސްޓަރު އިބްރާހީމް ވަހީދު (އިބުރޭ) ވަނީ އެޕާޓީގެ ޤައުމީ މަޖިލީހެއް މިރޭ 8:30 ގައި އިމާދުއްދީން ސްކޫލުގައި އޮންނާނެކަމަށް ވިދާޅުވެ ޓުވީޓުކުރައްވާފައެވެ. މި ބައްދަލުވުމުގައި ބޮނޑިބަތް ކެއުން އޮންނާނެކަމަށްވެސް އޭނާ ވިދާޅުވެފައިވެއެވެ.
"ޖާގަ އޮތް ވަރަކުން އާއްމު މެންބަރުންނަށް އަޑުއަހަން ވަދެވޭނެ" އިބުރޭ ވިދާޅުވިއެވެ.
ރާއްޖޭގެ ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ނެގުމާބެހޭ ޤަރާރު ރައްޔިތުންގެ މަޖިލީހަށް ހުށަހަޅާފައިވަނީ ހުޅުދޫ ދާއިރާގެ މެންބަރު އިލްޔާސް ލަބީބެވެ. މަޖިލީހުން ވަނީ މި ޤަރާރު ބަލައިގަނެ، ނިޒާމީ ވޯޓެއް ނެގުމުގެ ކަންކަން ކުރުމަށް އިލެކްޝަންސް ކޮމިޝަން (އީސީ)އަށް ވެސް އަންގައިފައެވެ. އެ ވޯޓު ނެގުމަށް ހަމަޖެހިފައިވަނީ މިމަހުގެ 29 ވަނަ ދުވަހުއެވެ.
ޤަރާރު ހުށަހަޅުއްވަމުން އިލްޔާސް ވިދާޅުވީ މިހާރު ރާއްޖޭގައި އޮންނަ ރިޔާސީ ނިޒާމުގެ ތެރެއިން ފުރަތަމަ ބުރުން އެއްވެސް ކެންޑިޑޭޓަކަށް ރިޔާސީ އިންތިޚާބު ކާމިޔާބު ނުކުރެވޭކަމަށާއި، އެހެންކަމުން މިހާރު މިއޮތް ރިޔާސީ ނިޒާމާބެހޭގޮތުން ރައްޔިތުންނާ ހަމައަށް ފެންނަ ނުފެންނަ ވޯޓެއް ގެނައުން މުޙިއްމުކަމަށާއި، ރައްޔިތުން ނިންމާ ގޮތެއްގެ މަތިން ކުރިއަށް ދިއުމަކީ އެންމެ ފަހުގޮތްކަމަށެވެ.
ރިޔާސީ އިންތިޚާބުގެ ފުރަތަމަ ބުރަށްފަހު ޑިމޮކްރަޓްސްއިން ވަނީ ވެރިކަންކުރާ ނިޒާމު ބަދަލުކުރުމަށް އެޕާޓީން ގެންގުޅޭ ވިސްނުން، ދެ ކެނޑިޑޭޓުންނާއި ޕާޓީތަކަށް ޚިއްސާކޮށްފައެވެ. އަދި ދެ ޕާޓީންވެސް ނިޒާމީ ވޯޓެއް ނަގަން އެއްބަސްވިނަމަވެސް، ބަރުލަމާނީ ނިޒާމަކަށް ތާއީދުކުރާކަމަށް އިޝާރާތްކޮށްފައެއްނުވެއެވެ.
ޕީޕީއެމް/ޕީއެންސީ ކޯލިޝަނުން ވަނީ ބަރުލަމާނީ ނިޒާމަކަށް ތާއީދު ނުކުރާކަމަށް ތަކުރާރުކޮށް ޖަލްސާތަކުގައި ހާމަކުރައްވާފައެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އިބްރާހިމް މުޙައްމަދު ޞާލިޙު ވަނީ ރައްޔިތުންގެ ބަހެއް ލިބިގެން މެނުވީ ވެރިކަމުގެ ނިޒާމު ބަދަލުކުރުމަށް މަސައްކަތްނުކުރައްވާނެކަމަށް ވިދާޅުވެފައެވެ. ރައީސް އިތުރަށް ވިދާޅުވީ މަޖިލީހުން ފާސްވެގެން އެމަނިކުފާނަށް ތަސްދީޤުކުރުމަށް ފޮނުވީމާ، އެކަން ކުރެވޭނީ ރައްޔިތުންގެ ބަހެއް ހޯދައިގެންކަމަށެވެ.
"...އެހެންވީމާ އެ ޕްރޮސެސް އައީމަ އަޅުގަނޑު ދާނަން ރައްޔިތުން ކައިރިއަށް، އެ ގެންނަ ބަދަަލަކީ ރައްޔިތުން ޤަބޫލުކުރާ ބަދަލެއްތޯ ބެލުމަށް، ރައްޔިތުން ޤަބޫލު ނުކޮށްފިއްޔާ އަޅުގަނޑަށް ތަސްދީޤެއް ނުކުރެވޭނެ" ރައީސް ވިދާޅުވެފައިވެއެވެ.
ރައީސް މިހެން ވިދާޅުވިނަމަވެސް، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަނީ ރައްޔިތުންގެ މަޖިލީހަށް ލިބިގެންވާ ޤާނޫނު ހެދުމުގެ ޢާއްމު ބާރުތަކުގެ ތެރެއިން ޚިޔާލު ހޯދުމުގެ ވޯޓެއް ނަގާފައިވާ ކަމަކާ ގުޅިގެން ގެންނަ ބަދަލާ މެދު ޢާންމުންގެ ޚިޔާލު އިތުރަށް ހޯދާކަށް ނުޖެހޭނެކަމަށް ބަޔާންކޮށް، ޤާނޫނު އަސާސީގެ 70 ވަނަ މާއްދާއަށް އިސްލާޙެއް ހުށަހަޅުއްވާފައެވެ.
މިހާރު އެ މާއްދާގައި ބަޔާންކޮށްފައިވަނީ ވެރިކަމުގެ ނިޒާމު ބަދަލު ކުރެވޭނީ ޤާނޫނު އަސާސީއަށް އިސްލާޙު ގެނައުމުގެ ބިލެއް މަޖިލީހުން ފާސްކުރުމަށް ފަހު، އެ ބިލު ރައީސް ތަސްދީޤުކުރެއްވުމުގެ ކުރިން، ރައްޔިތުންގެ ފެންނަ ނުފެންނަ ވޯޓެއް ނެގުމަށްފަހު ކަމަށެވެ.
ވެރިކަމުގެ ނިޒާމު ބަދަލުކުރުމަށް ދަ ޑިމޮކްރަޓްސްގެ ފަރާތުން ކެނޑިނޭޅި މަސައްކަތްކުރަމުންދާއިރު، ރައީސް ނަޝީދު ވަނީ ރައީސް ޞާލިޙުއާ ބައްދަލުކޮށް މިކަމާ ގުޅޭގޮތުން މަޝްވަރާކުރައްވާފައެވެ. އަދި ކުރީގެ ރައީސް ޢަބްދުﷲ ޔާމިންއާ ބައްދަލުކުރުމަށްވެސް މަސައްކަތްކުރައްވާފައިވެއެވެ.
