އައު ސަރުކާަރަށް އެއްވެސް ވަރަކަށް ދަތި ކުރުމުގެ ރޫޙެއް ނެތް: އަސްލަމް
އައު ސަރުކާރަށް އެއްވެސް ވަރަކަށް ދަތި ކުރުމުގެ ރޫޙެއް ނެތް ކަމަށް ވެރިކަން ކުރާ މައި ޕާޓީ، އެމްޑީޕީގެ ޕީޖީ ލީޑަރު، އަދި ރައްޔިތުންގެ މަޖިލީހުގެ މެޖޯރިޓީ ލީޑަރު މުޙައްމަދު އަސްލަމް ވިދާޅުވެއްޖެއެވެ.
އެމްޑީޕީގެ ޕީޖީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި، އަންނަ އަހަރުގެ ބަޖެޓު އެކުލަވާލުމުގައި އިންތިޚާބީ ރައީސް ޑރ.މުޙައްމަދު މުޢިއްޒުގެ ސަރުކާރަށް އެއްބާރުލުން ދޭނަންތޯ ނޫސްވެރިޔަކު ސުވާލު ކުރުމުން، އަސްލަމް ވިދާޅުވީ އައު ސަރުކާރަށް ދަތި ކުރުމުގެ އެއްވެސް ރޫޙެއް ނެތް ކަމަށެވެ.
"އަޅުގަނޑުމެންގެ މަސްއޫލިއްޔަތަކަށް ވާނީ، މި ދެންނެވީ، އައު ސަރުކާރެއް އެކުލަވާލެވުމަށްފަހު، އެ ސަރުކާރެއް ޖަވާބުދާރީ ކުރުވުން. ޒިންމާދާރު ގޮތުގައި އަޅުގަނޑުމެން އެކަން ކުރާނީ. އެކަން އަޅުގަނޑުމެން ކުރާނަން." ރައްޔިތުންގެ މަޖިލީހުގައި، ހިތަދޫ މެދު ދާއިރާ ތަމްސީލު ކުރައްވާ މެމްބަރު އަސްލަމް ވިދާޅުވިއެވެ.
އޭނާ އިތުރަށް ވިދާޅުވީ އިދިކޮޅު ސިޔާސީ ޕާޓީއެއްގެ ގޮތުގައި އެމްޑީޕީން ހަރަކާތްތެރިވިޔަސް، ސަރުކާރަށް ޖެއްސުން ކުރުމާއި، އުނދަގޫ ކުރުމާއި، ފުރައްސާރަ ކުރުމުގެ ނިޔަތުގައި، އެމްޑީޕީގެ މެޖޯރިޓީ އޮންނަ މަޖިލީހުން އެއްވެސް ކަމެއް ނުކުރާނެ ކަމަށް ވެސް އޭނާ ވިދާޅުވިއެވެ.
