ޤައުމު ކުރިއަރުވާ ޚިދުމަތް ކުރުމުގެ ޒިންމާ ކޮންމެ މީހަކަށްވެސް އެބައޮތް: ފައިސަލް
ޤައުމު ކުރިއަރުވާ ޚިދުމަތް ކުރުމުގެ ޒިންމާ ކޮންމެ މީހަކަށްވެސް އެބައޮތް ކަމަށް ރައީސުލްޖުމްހޫރިއްޔާގެ ނައިބް ފައިޞަލް ނަޞީމް ވިދާޅުވެއްޖެއެވެ.
ނައިބު ރައީސް ފައިސަލް މިހެން ވިދާޅުވީ އިސްކަންދަރު ސްކޫލްގެ އެކި މަޤާމްތަކަށް ހޮވުނު ދަރިވަރުންނަށް ލިޔުން ހަވާލު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
އެގޮތުން މި ރަސްމިއްޔާތުގައި ނައިބު ރައީސް ފައިސަލް ވަނީ ކޮންމެ މަޤާމެއްގައި ހުރިނަމަވެސް ޤައުމުގެ މައްސަލަތަކާއިމެދު ވިސްނާ، އެކަންތައްތައް ޙައްލު ކުރުމުގެ ބައިވެރިއަކަށް ވުމަށް ގޮވާލައްވާފައެވެ.
ޤައުމުގައި ހިނގާ ކަންތައްތައް ހައްލު ކުރުމަށް ފައިދާވާނެ ގޮތަކަށް ވިސްނާ އެކަންކަން ހައްލު ކުރުމުގެ ބައިވެރިއަކަށް ވާންޖެހޭ ކަމަށް ފައިސަލް ވަނީ ގޮވާލައްވާފައެވެ.
މިގޮތުން ކޮންމެ މަޤާމެއްގައި މަސައްކަތް ކުރަމުންދާ މީހެއް ނަމަވެސް، ޤައުމު ކުރިއަރުވާ ޚިދުމަތް ކުރުމުގެ ޒިންމާ އެމީހަކަށް އޮތް ކަމަށް ފައިސަލް ވަނީ ވިދާޅުވެފައެވެ.
އެހެންނޫންނަމަ ކިތަންމެ ގިނަ ވެރިކަމެއް ނިމިގެން ދިޔަނަމަވެސް އެފަދަ ނޭދެވޭ ކަންތައްތަކަށް އެކަށީގެންވާ ހައްލެއް ނާންނާނެ ކަމަށް ފައިސަލް ވިދާޅުވިއެވެ. އަދި ތަޙްޒީބު މުޖުތަމަޢުއެއް ބިނާކުރުމަށް ހުރިހާކަމެއްގައިވެސް ފަރުދީ ޒިންމާ އަދާކުރުމަށް ނައިބު ރައީސް ފައިސަލް ވަނީ އިލްތިމާސް ކުރައްވާފައެވެ.
މީގެ އިތުރުން ދަރިވަރުންނާ މުޚާތަބުކުރައްވާ ނައިބު ރައީސް ވަނީ ހުރިހާ ފިކުރެއްގެ ކުދިންނާ ގުޅިގެން މަސައްކަތް ކުރުމަށާއި، ހުރިހާ ކަމެއްގައިވެސް ކުދިން ޝާމިލް ކުރުމަށާއި، އެންމެންނަށްވެސް ހިތްހެޔޮ ކުދިބަޔަކަށް ވުމަށް ނަސޭހަތްތެރިވެ ވަޑައިގެންފައެވެ.
އަދުގެ ދަރިވަރުން އެންމެ ބޮޑު އިސްކަމެއް ދޭންވީ އެއްކަމަކީ ސްކޫލް ނިމުމުގެ ކުރިން ކޮންމެވެސް މަސައްކަތެއް ދަސްކޮށް ހުނަރުވެރި، މަސައްކަތަށް މޮޅެތި ކުދިބަޔަކަށްވެ، ޤައުމަށް ޚިދުމަތް ކުރުމަށް ނުކުތުމަށް އަމާޒު ހިފުމަށް ކަމަށް ވެސް ނައިބު ރައީސް ފައިސަލް ވަނީ އިލްތިމާސް ކުރައްވާފައެވެ.
ހަމަ އެހެންމެ ކޮންމެ ކަހަލަ މާހައުލެއްގައި އުޅެންޖެހުނު ނަމަވެސް ލީޑަރަކަށް ވާން ބޭނުންވާ ކުއްޖާ، ލީޑަރެއްގެ ކިބައިގައި ހުންނަ ސިފަތަކާ އެއްގޮތަށް ދިރިއުޅުމަށް ފައިސަލް ވަނީ ނަސޭހަތްތެރިވެ ވަޑައިގެންފައެވެ.
Ads by STO
