ފަލަސްޠީނުގެ ދިފާޢުގައި މާދަމާ ބޮޑު އެއްވުމެއް ބާއްވަނީ
އިޒްރޭލްގެ ޔަހޫދީންގެ އަނިޔާ ތަޙައްމަލު ކުރަމުންދާ ފަލަސްޠީނުގެ ރައްޔިތުންގެ ދިފާޢުގައި މާލޭގައި ބޮޑު އެއްވުމެއް ބާއްވަން ނިންމައިފިއެވެ.
މި އެއްވުމަކީ އިންޓަނޭޝަނަލް އެއިޑް ކެމްޕެއިން (އައިއޭސީ) އާއި ގިނަ އަދަދެއްގެ މަދަނީ ޖަމިއްޔާތަކާ ގުޅިގެން ބާއްވާ ހިނގާލުމެކެވެ.
މި ހަރަކާތް އޮންނާނީ މާދަމާ ހަވީރު 4 ޖަހާއިރު އާޓިފިޝަލް ބީޗުގައެވެ.
މި އެއްވުމުގައި ބައިވެރިވާން އަންނަ ފަރާތްތަކުން ފަލަސްތީނުގެ ދިދަ ނުވަތަ ފަލަސްތީނުގެ ދިދައިގައި އެކުލެވޭ ކުލަތައް ތުރުކުރުމަށް ނުވަތަ ފޮތިކޮޅެއް ހިފައިގެން އައުމަށް ވަނީ އެދިފައެވެ.
މިއީ ފަލަސްތީނާއެކު ދިވެހި ރައްޔިތުން ތިބިކަން މުޅި ދުނިޔެ އަށް ދައްކާލުމަށް ބާއްވާ ހަރަކާތަކަށް ވާތީ، މި އެއްވުން އަމާން އެއްވުމަކަށް ހެދުމަށް އައިއޭސީން އެދެއެވެ.
ފަލަސްތީނަށް އެހީވުމުގެ ގޮތުން ގިނަ ހަރަކާތްތަކެއް ކުރިއަށް ގެންދަން ރާވައިފައިވާއިރު، ރާއްޖޭގެ ހުރިހައި މީޑިއާތަކުން ގުޅިގެން ޚާއްސަ ޓެލެތޯނެއް މާދަމާ ފެށުމަށް ވަނީ ހަމަޖެހިފައެވެ.
އެ ޓެލެތޯން މި މަހުގެ 17 ގެ ނިޔަލަށް ކުރިއަށްދާނެއެވެ.
އަދި މާލޭ ސަރަހައްދުގެ ހުރިހައި މިސްކިތްތަކެއްގެ ބޭރުގައި ފަންޑު ފޮށި ބެހެއްޓުމަށް ނިންމާފައި ވެސް ވެއެވެ.
މީގެއިތުރުން، މާދަމާ ކާރު ސައިކަލު އެސޯސިއޭޝަންތަކުން ބާއްވާ އިވެންޓެއް ހުޅުމާލޭ ސެންޓްރަލް ޕާކުގައި އޮންނާނެއެވެ. އަދި ހޮނިހިރު ދުވަހުގެ ރޭ އާޓިފިޝަލް ބީޗު ސަރަހައްދުގައި ހިމޭން އިހްތިޖާޖެއް ބޭއްވުމަށް ވެސް ނިންމައިފައިވެއެވެ.
