މިހާރު އޮތް ސަރުކާރަށް ދިވެހިން ނޫނެކޭ ބުނީ އިންޑިއާ ސިފައިން މިތަނުން ބޭލުމަށް, އުންމީދަކީ ފުރަތަމަ ހަފްތާގައި އިންޑިއާ ސިފައިން ބޭލުން: ޑރ. މުޢިއްޒު

މިދިޔަ ސެޕްޓެންބަރު މަހު އޮތް ރިޔާސީ އިންތިޚާބުގައި މިހާރު އޮތް, ރައީސް އިބްރާހީމް މުޙައްމަދު ޞާލިޙްގެ ސަރުކާރު ބަލިވުމުގެ މައިގަނޑު އެއް ސަބަބަކީ ރާއްޖޭގައި އިތުރު ޤައުމެއްގެ ސިފައިން ތިބުމަށް ދިވެހިން ނޭދުން ކަމަށް, އިންތިޚާބީ ރައީސް, ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރިޔާސީ އިންތިޚާބު ކާމިޔާބު ކުރެއްވުމަށްފަހު ފުރަތަމަ ފަހަރަށް ބޭރުގެ މީޑިއާ އަކަށް ދެއްވި އިންޓަރވިއުގައި ޑރ. މުޢިއްޒު ވަނީ އެމަނިކުފާނުގެ ސަރުކާރުން އިންޑިއާއާއެކު ގެންގުޅުއްވާނެ ސިޔާސަތުތައް ވަރަށް ތަފްސީލްކޮށް ކިޔާދެއްވާފައެވެ.
"އަޅުގަނޑުމެންގެ ފޮރިން ޕޮލިސީ މިވަގުތު މިއޮތީ ދިވެހިންނަށް އެންމެ ރަނގަޅަކަށް ނޫން. ދިވެހިންނަށް ދިވެހި ރާއްޖޭގެ މިނިވަންކަމާމެދު މިވަނީ ސުވާލު އުފެދިފައި." މި ސަރުކާރުގެ ޚާރިޖީ ސިޔާސަތުތަކަށް ފާޑު ވިދާޅުވަމުން އަލް ޖަޒީރާއަށް ދެއްވި އިންޓަރުވިއުގައި ޑރ. މުޢިއްޒު ވިދާޅުވިއެވެ.
ޑރ. މުޢިއްޒު ފާހަގަ ކުރެއްވި ގޮތުގައި އެއްވެސް ޤައުމެއްގެ ސިފައިން ރާއްޖޭގައި ތިބުމަކީ, ދިވެހިން ޤަބޫލު ކުރާ ގޮތުގައި މިނިވަންކަމަށް އޮތް ހުރަހެއް ކަމަށެވެ. އަދި މިހާރުގެ ރައީސުލްޖުމްހޫރިއްޔާ ވެސް ދިވެހި ރާއްޖޭގައި އިންޑިއާ ސިފައިން ތިބި ކަމަށް ވިދާޅުވެފައިވާ ކަމަށާއި, ކޮންމެ ކަމެއް ކުރަން ނަމަވެސް އެއްވެސް ޤައުމެއްގެ ސިފައިން ރާއްޖޭގައި ތިބެވިގެން ނުވާނެ ކަމަށް ޑއ. މުޢިއްޒު ވިދާޅުވިއެވެ.
ހަމައެހެންމެ, ރާއްޖޭގައި ތިބީ ކިހާ ސިފައިންނެއްކަން އެނގިވަޑައި ނުގަންނަވާކަން ފާހަގަކުރައްވިއެވެ. އަދި ރާއްޖޭގައި ތިބި އިންޑިއާ ސިފައިންގެ ޢަދަދު ހާމަނުކުރުމަށް ސުޕްރީމް ކޯޓުގައިވެސް ސަރުކާރުން އެދިފައިވާކަން މުއިއްޒު ވަނީ ފާހަގަ ކުރައްވާފައެވެ. އަދި ވިދާޅުވީ, ޑިޕްލޮމެޓިކް އުސޫލުގެ ތެރެއިން އެ ޤައުމުގެ ސިފައިން ބާލަން ސަރުކާރުން ފުރަތަމަ ދުވަހުން ފެށިގެން މަސައްކަތް ފައްޓަވާނެ ކަމަށެވެ.
"ފުރަތަމަ ދުވަހުން ފެށިގެން ޑިޕްލޮމެޓިކް އުސޫލުތަކުން އިންޑިއާ ސިފައިން ބޭލުމުގެ މަސައްކަތް ކުރާނަން. އުންމީދަކީ ހަފްތާއެއްގެ ތެރޭގައި އެމީހުން ރާއްޖެއިން ދިއުން" ޑރ. މުޢިއްޒު ވިދާޅުވީ އިންޑިއާގެ ސިފައިން ރާއްޖޭގައި ތިބޭ މައްސަލައިގައި ރާއްޖޭގައި ހުންނަ އިންޑިއާގެ އެންބަސީއާ މަޝްވަރާ ކުރެވިފައިވާ ކަމަށާއި, އަދި އެކަން ހައްލު ކުރުމަށް އެކުގައި މަސައްކަތް ކުރުމަށް ދެފަރާތުން ގުޅިގެން މަސައްކަތް ކުރައްވާނެ ކަމުގެ ޔަޤީންކަން ދެއްވާފައިވާ ކަމަށެވެ.
އޭގެ އިތުރުން ރާއްޖޭގައި ހުންނަވާ އިންޑިއާ ސަފީރު މުނޫ މަހާވަރާއި ބައްދަލުކުރައްވާ ކުރެއްވުނު މަޝްވަރާތަކުގައި އިންޑިއާއިން ނަގާފައިވާ ލޯނުތައް ރީފައިނޭންސް ކުރާނެ ގޮތަކާމެދު މަޝްވަރާ ކުރެވުނު ކަމަށް ވެސް ޑރ. މުޢިއްޒު ވިދާޅުވިއެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.