އެމްއެމްއޭގެ ކުރީގެ ގަވަރުނަރު ޑރ.ފަޒީލް ފުވައްމުލަކު ދެކުނު ދާއިރާއަށް ވާދަ ކުރައްވަނީ
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ، (އެމްއެމްއޭ) ގެ ކުރީގެ ގަވަރުނަރު ޑރ.ފަޒީލް ނަޖީބު ރައްޔިތުންގެ މަޖިލީހުގެ އިންތިޚާބުގައި ވާދަކުރައްވަން ނިންމަވައިފިއެވެ.
ޑރ.ފަޒީލް ވާދަކުރެއްވުމަށް ނިންމަވާފައި ވަނީ ޕީޕީއެމް/ޕީއެންސީގެ ޓިކެޓުގައި އަމިއްލަފުޅު ރަށްކަމަށްވާ ފުވައްމުލަކުގެ ދެކުނު ދާއިރާއަށެވެ.
މިކަން ހާމަކޮށް ޑރ. ފަޒީލް ވިދާޅުވީ މަޖިލިސް އިންތިޚާބުގައި ވާދަކުރައްވަން ނިންމެވީ އިންތިޚާބީ ރައީސް ޑރ. މުހައްމަދު މުޢިއްޒާއެކު އެ މަނިކުފާނުގެ ރިޔާސީ ވައުދުތައް ތަންފީޒުކުރުމަށް މަސައްކަތް ކުރުމަށް ކަމަށެވެ.
މީގެ އިތުރުން ފުވައްމުލަކު ދެކުނު ދާއިރާގެ ރައްޔިތުންގެ ތާޢީދަށް އެދި ޑރ. ފަޒީލް ވިދާޅުވީ މަޤާމަށް ކުރިމަތިލާން ނިންމެވީ ދިވެހި ރައްޔިތުން އަދި ހާއްސަކޮށް އުފަން ރަށް ފުވައްމުލަކުގެ ރައްޔިތުންނަށް ޚިދުމަތްކުރުމުގެ ނިޔަތުގައި ކަމަށެވެ.
ކޮމާޝަލް ލޯ (އިންޓެލެކްޗުއަލް ޕްރޮޕަޓީ) އިން ޕީއެޗްޑީ ހާސިލް ކުރައްވައި، އިންޓަނޭޝަނަލް ބިޒްނަސް ލޯ އިން އެލްއެލްއެމް އަދި އިކޮނޮމިކްސް އިން ބީއޭ އޮނަރސް ޑިގްރީ ހާސިލް ކުރައްވާފައިވާ ޑރ. ފަޒީލް ވަނީ 2008 ވަނަ އަހަރުގެ އޮކްޓޯބަރު މަހުގެ 22 ވަނަ ދުވަހުން ފެށިގެން ފަސް އަހަރު ދުވަސްވަންދެން މަރުކަޒީ ބޭންކް، އެމްއެމްއޭގެ ގަވަރުނަރުކަމުގެ މަޤާމު އަދާކުރައްވާފަ އެވެ. އޭނާ އިސްތިއުފާދެއްވީ، ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި، 2013 ވަނަ އަހަރުގެ ޑިސެމްބަރު މަހުގެ ތެރޭގަ އެވެ.
އިންޓަނޭޝަނަލް މަނިޓަރީ ފަންޑުގެ މޯލްޑިވްސްގެ ގަވަރުނަރުގެ އިތުރުން ދެކުނު އޭޝިއާގެ މަރުކަޒީ ބޭންކުތަކުގެ ނެޓްވޯކެއް ކަމަށްވާ ސާކް ފައިނޭންސްގެ މިހާރުގެ ޗެއާމަނަކީވެސް ޑރ.ފަޒީލް ނަޖީބެވެ.
Ads by STO
