ސިޔާސީގޮތުން ވަކިބަޔަކު ބޭނުންވާކަމެއް ނުކުރެވުނެއްކަމަކު ދައުލަތް ހުއްޓުވައެއް ނުލެވޭނެ: މުހުތާޒް
ސިޔާސީގޮތުން ވަކިބަޔަކު ބޭނުންވާ ވަކިކަމެއް ނުކުރެވުނެއްކަމަކު ދައުލަތް ހުއްޓުވައެއް ނުލެވޭނެކަމަށް ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން ވިދާޅުވެއްޖެެއެވެ.
މުހުތާޒް މިހެން ވިދާޅުވީ، ރައީސް ނަޝީދު މަޖިލީހުގެ މަޤާމުން ދުރުކުރުމަށް އެމްޑީޕީން ކުރަމުން އަންނަ މަސައްކަތްތަކަށް ފާޑުވިދާޅުވަމުންނެވެ. ރައީސް ނަޝީދު ވަކި ކުރުމަށް އިތުބާރު ނެތް ކަމުގެ މައްސަލަ ކުރިއަށް ނުގެންގޮސް، އިންތިޚާބީ ރައީސް ޑރ. މުހައްމަދު މުޢިއްޒު ރައީސުލްޖުމްހޫރިއްޔާގެ މަޤާމުގެ ހުވާކުރައްވައިފިނަމަ އެ ހުވާ ގަބޫލު ނުކުރާނެ ކަމަށް ސަރުކާރު ހިންގާ އެމްޑީޕީގެ ޕާލިމެންޓްރީ ގުރޫޕުން އިއްޔެ ވިދާޅުފައިވެއެވެ.
މުހުތާޒް ކުރެއްވި ޕޯސްޓެއްގައި ވިދާޅުވީ، ސިޔާސީ ވަކި ބަޔަކު ބޭނުންވާ ވަކިކަމެއް ނުކުރެވުނެއްކަމަކު މިދައުލަތް ހުއްޓުވައެއް ނުލެވޭނެކަމަށާއި އެމަގުން އެކަން ހިންގުމަށް ފުރުސަތެއްވެސް ނުދެވޭނެކަމަށެވެ.
އެމްޑީޕީގެ ޕާލިމެންޓްރީ ގްރޫޕުން ވިދާޅުވެފައިވަނީ އަންނަ އާދީއްތަ ދުވަހަށް އެޖެންޑާ ކޮށްފައިވާ ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންގޮސް، އިންތިޚާބީ ރައީސް ޑރ. މުޙައްމަދު މުއިއްޒު ހުވާކުރައްވާ ރަސްމިއްޔާތުގެ ރިޔާސަތުގައި ރައީސް ނަޝީދު އިންނަވައިގެން ޑރ. މުއިއްޒު ހުވާކޮށްފިނަމަ، އައު ޖުމްހޫރިއްޔާގެ ކެބިނެޓަށް ރުހުން ނުދޭނެކަމަށެވެ.
މިކަމާއި ގުޅިގެން މުހުތާޒު ވިދާޅުވީ "އަޅުގަނޑުމެންނަކީ ސިޔާސީގޮތުން ތަސައްރަފް ފުދިފައިވާ ބަޔަކަށް ވާން އެބަޖެހޭ" ކަމަށެވެ.
