ވީއައިއޭގެ އާ ޓާމިނަލްގެ މަސައްކަތް އަވަސްކުރަން ކޮމިޓީއެއް އުފައްދާނަން: ޑރ. މުއިއްޒު
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޕެސެންޖަރ ޓާމިނަލްގެ މަސައްކަތައް އަވަސްކުރުމަށް ރައީސް އޮފީހުގައި ކޮމިޓީއެއް އުފައްދާނެކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއީ) އިން ބޭއްވި ޖަލްސާގައި ބައިވެރިވެވަޑައިގެން ވާހަކަފުޅު ދައްކަވަމުންނެވެ. އެމަނިކުފާނު ވަނީ ރާއްޖޭގެ އިޤްތިޞާދު ރަނގަޅުކުރުމަށް ކުރަންޖެހިފައި އޮތް އެންމެ ބޮޑުކަމަކީ އެއާޕޯޓު ތަރައްޤީކުރުމުގެ މަސައްކަތް ނިންމުންކަމަށް ވިދާޅުވެފައެވެ.
ޑރ. މުއިއްޒު ވިދާޅުވީ މިހާތަނަށް ލިބުނު މަޢުލޫމާތުތަކަށް ބަލާއިރު އާ ޓާމިނަލްގެ މަސައްކަތް ނިންމެން އޮތީ 2025 ވަނަ އަހަރުގެ ޖުލައި މަހުގެ ނިޔަލަށެވެ. ނަމަވެސް އެމަނިކުފާނު މަސައްކަތް ކުރައްވަނީ އަންނަ އަހަރުގެ ސެޕްޓެންބަރު މަހުގެ ނިޔަލަށް ނިންމުމަށްކަމަށްވެސް ވިދާޅުވެފައިވެއެވެ.
"އެހެންވެ އެއީ ޝެޑިއުލްއަށްވުރެ އަށެއްކަ މަސް ދުވަހުގެ އަވަސް ކުރުމެއް، އިރާދަކުރެއްވިއްޔާ އެކަން ވާނެ" މުއިއްޒު ވިދާޅުވިއެވެ.
ޑރ. މުއިއްޒު ވިދާޅުވީ އެމަނިކުފާނު ވެރިކަމާ ޙަވާލުވެވަޑައިގެންނެވުމަށްފަހު އެންމެ ފުރަތަމަ މަސައްކަތެއްގެ ގޮތުން ރައީސް އޮފީހުގައި އެއާޕޯޓުގެ މަސައްކަތްތަކަށް ޚާއްސަކޮށް ކޮމިޓީއެއް އެކުލަވާލައްވާނެކަމަށެވެ. އަދި މި ކޮމިޓީގައި ކަމާބެހޭ ސްޓޭކްހޯލްޑަރުން ތިއްބަވާނެކަމަށާއި، ކޮމިޓީ ޗެއާކުރައްވާނީ އެމަނިކުފާނުކަމަށެވެ.
މި ކޮމިޓީގައި އެއާޕޯޓުގެ މަޝްރޫޢުތަކާއި ގުޅޭގޮތުން ނިންމަންޖެހޭ ނިންމުންތައް ވީއެންމެ އަވަހަށް ނިންމާނެކަމަށްވެސް އެމަނިކުފާނު ވިދާޅުވިއެވެ.
"ކޮންމެ ދުވަހު އެ މަސައްކަތް ދާ ގޮތް ބަލައި، އެކަމަށްޓަކައި ނަގަން ޖެހޭ ޑިޒިޝަންތައް ވަގުތުން ނެގުމާއި، އަޅުގަނޑުމެންނަށް ވަރަށް ކާމިޔާބުކަމާއެކީ ނިންމިފައިވާ ބްރިޖުގެ މަސައްކަތް ދިޔަ ގޮތަށް ބައްޓަންކޮށް މި ދެންނެވި ތާރީހަށް ނިންމުން" މުއިއްޒު ވިދާޅުވިއެވެ.
ޑރ. މުއިއްޒު އިންތިޚާބީ ރައީސްއަކަށް ހޮވިވަޑައިގަތުމަށްފަހު ސައުދީގެ ސަފީރާ ބައްދަލުކުރައްވައި، އޭގެ ކުޑަ ދުވަސްކޮޅެއްފަހުން ސައުދީން ވަނީ އާ ޓާމިނަލް ނިންމުމަށް އިތުރު 100 މިލިއަން ޑޮލަރު ދިނުމަށް ނިންމާފައެވެ.
