ރޭލްވޭގެ ތިން މަޝްރޫއަކަށް ފައިސާ ދިނުމަށް ފިލިޕީންސުން ޗައިނާއަށް ދެން ނުބަލާނެ: ރިޕޯޓް
ފިލިޕީންސްގެ ރައީސް ރޮޑްރިގޯ ޑުޓާޓޭ މެދުވެރިކުރެއްވި ތިން ރޭލްވޭ ޕްރޮޖެކްޓަކަށް މާލީ އެހީތެރިކަން ހޯދުމަށް ފިލިޕީންސުން މިހާރު ޗައިނާއަށް ނުބަލާނެ ކަމަށް ޑިޕްލޮމެޓް އިން ބުނެއެވެ.
ފިލިޕީންސްގެ ޓްރާންސްޕޯޓް ސެކްރެޓަރީ ޖައިމް ބައުޓިސްޓާ ބުދަ ދުވަހު މެނީލާގައި ޖަރުމަނާއި ފިލިޕީންސްގެ ވިޔަފާރިވެރިންގެ ފޯރަމެއްގައި ވާހަކަ ދައްކަވަމުން ވިދާޅުވީ އެ މަޝްރޫއުތަކަށް ޗައިނާގެ ޝައުގުވެރިކަން ގެއްލިފައިވާ ކަމަށް ފެންނަ ކަމަށެވެ.
ބައުޓިސްޓާ ވިދާޅުވި ގޮތުގައި މި ނިންމުމަކީ ދެކުނު ޗައިނާ ކަނޑުގައި ޗައިނާ އާއި ފިލިޕީންސްއާ ދެމެދު ދާދި ފަހުން ހިނގި ހަމަނުޖެހުންތަކުގެ ސަބަބުން ނުފޫޒު ފޯރުވި ނިންމުމެއް ނޫން ކަމަށާއި، ސްޕްރެޓްލީ އައިލެންޑްސްގެ ސެކަންޑް ތޯމަސް ޝޯލްގައި ތިބޭ ސިފައިންނަށް ބޭނުންވާ ސާމާނު އަލުން ފުރުމަށް މަސައްކަތް ކުރަމުން ދަނިކޮށް މިދިޔަ ހަފުތާ ބަންދުގައި ޗައިނާ އާއި ފިލިޕީންސްގެ އުޅަނދުތަކާ ދެމެދު ކުރިމަތިލުންތަކެއް ހިނގި ކަމަށެވެ.
"ދަ ޑިޕްލޮމެޓް" ގައި ލިޔުއްވާފައިވާ ޑިޕްލޮމެޓްގެ ދެކުނު އިރުމަތީ އޭޝިއާގެ އެޑިޓަރު ސެބެސްޓިއަން ސްޓްރާންޖިއޯ ވިދާޅުވީ، އޭގެ ތެރެއިން ފުރަތަމަ ޕްރޮޖެކްޓަކީ މެނީލާގެ ދެކުނުގައި އޮންނަ ސިޓީއެއް ކަމަށްވާ ކަލަމްބާއިން ލުޒޮންގެ ދެކުނުކޮޅުގައި އޮންނަ ބިކޯލް ޕްރޮވިންސަށް 380 ކިލޯމީޓަރުގެ ސަރަހައްދެއްގައި 142 ބިލިއަން ޕެސޯ (2.5 ބިލިއަން ޑޮލަރު) ގެ ރޭލްވޭއެއް ކަމަށާއި ދެވަނަ ޕްރޮޖެކްޓަކީ ފިލިޕީންސްގެ ދެކުނުގައި އޮންނަ މިންޑަނާއޯގައި 83 ބިލިއަން ޕެސޯ (1.45 ބިލިއަން ޑޮލަރު) 100 ކިލޯމީޓަރުގެ ކޮމިއުޓާ ރޭލް ލައިނެއް ކަމަށެވެ.
ތިންވަނަ އަދި އެންމެ ސިމްބޮލިކް ރޭލްވޭއަކީ ސަބިކް ބޭ ފްރީޕޯޓް ޒޯނާއި ކްލާކް ފްރީޕޯޓް ޒޯން ގުޅުވައިދޭ 71 ކިލޯމީޓަރުގެ ފްރައިޓް ރޭލްވޭއެވެ. މި މަޝްރޫއަށް 51 ބިލިއަން ޕެސޯ (896 މިލިއަން ޑޮލަރު) ހަރަދުވާނެ އެވެ.
