ކާކު ބުނީ މުޢިއްޒު ފާސް ނުވާނެއޭ؟ އަހަރުމެންގެ މަސައްކަތަކީ ފާސް ކުރުން: ރައީީސް ޔާމީން

އިންތިޚާބީ ރައީީސް ޑރ.މުޙައްމަދު މުޢިއްޒުގެ ސަރުކާރާއި ދެކޮޅަށް ނުކުމެވަޑައިގަންނަވާފާނަންތޯ ސުވާލު ކުރުމުން، އެމަނިކުފާނު "ބަތް ކައްކާ ނުކުޅުއްވާނެ" ކަމަށް އިދިކޮޅު ލީޑަރު، ރައީސް ޔާމީން ޢަބްދުލްޤައްޔޫމް ވިދާޅުވެއްޖެއެވެ.

Ads by STELCO

އެމަނިކުފާނުގެ ބަންދަށް ދިން ލުޔަށް ފަހުގައި، ޕީޕީއެމްގެ އޮފީހުގައި ބޭއްވި ޖަލްސާއެއްގައި، ފުރަތަމަ ފަހަރަށް ވާހަކަފުޅު ދައްކަވަމުން ރައީސް ޔާމީން ވިދާޅުވީ، މުޢިއްޒު ވެރިކަމުގެ ހުވާ ކުރެއްވުމަށްފަހުގައި، އެންމެ ފުރަތަމަ ވެސް ކުރައްވަން ޖެހިވަޑައިގަންނަވާނެ ދެ ކަމަކީ ރާއްޖޭގެ މަސް ކަނޑުން ގެއްލުނު ބައި ހޯދުމާއި، ރާއްޖޭގައި ތިބި އިންޑިއާ ސިފައިން ބޭލުން ކަމަށެވެ. މި ދެ ކަންތައް ކުރައްވައިފިނަމަ، ޑރ.މުޢިއްޒުއަށް "ފާސް މާކްސް ލިބިވަޑައިގަންނަވާނެ" ކަމަށް ވެސް ވިދާޅުވިއެވެ.

އެ ޖަލްސައަށް ފަހުގައި ނޫސްވެރިޔަކު ވަނީ، އެ ދެ ކަންތައް މުޢިއްޒަށް ނުކުރެވިއްޖެނަމަ، އެމަނިކުފާނުގެ ސަރުކާރާއި ދެކޮޅަށް ނުކުންނާނަންތޯ އަހައިފައެވެ. ޖަވާބުގައި ރައީސް ޔާމީން ވެސް ކުރެއްވީ ސުވާލެކެވެ.

"ކާކު ބުނީ(ޑރ.މުޢިއްޒު) ފާސް ނުވާނޭ. ކާކު ބުނީ ފާސް ނުވާނެއޭ. އަހަރުމެންގެ މަސައްކަތަކީ ފާސް ކުރުން.  ނޫސްވެރިން ތި ސުވާލު ނުކުރޭ، ކަލޭމެން ތި ސުވާލު ކުރޭ މިހާރު ހުރި ރައީސްއާ." އެމަނިކުފާނު ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، ޑރ.މުޢިއްޒުއަށް އޮތީ ބޮޑު ޒިންމާއެއް ކަމަށާއި، އެމަނިކުފާނަށް އެ ޒިންމާ އައީ، މިހާރު ހުންނެވި ރައީީސް އިބްރާހީމް މުޙައްމަދު ޞާލިޙު ހެއްދެވި ގޯހުގެ ސަބަބުން ކަމަށެވެ.