ފައިޞަލް ބޭނުންފުޅުވަނީ ސަރުކާރު ބަދަލު ވިޔަސް، ޤައުމަށް ޚިދުމަތް ކުރައްވަން
ކުރިއަށް އޮތް ތަނުގައި ޤައުމުގައި ހުރި މައްސަލަތަކަށް ޙައްލު ހޯދުމަށްޓަކައި މަސައްކަތް ކުރައްވާނެ ކަމަށް ނައިބު ރައީސް ފައިޞަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޖުމްހޫރީ ދުވަހާއި ގުޅިގެން ޓީވީއެމް އިން އިއްޔެ ދެއްކި ޕްރޮގްރާމެއްގައި ވާހަކަފުޅު ދައްކަވަމުންނެވެ. ފައިޞަލް ވަނީ ދިވެހިރާއްޖޭގެ ނައިބު ރައީސްގެ މަޤާމު އެންމެ ރަނގަޅަށް އަދާ ކުރެއްވޭތޯ ބައްލަވައިފައިވާނެ ކަމަށް ވިދާޅުވެފައެވެ.
އެމަނިކުފާނު ބެއްލެވީ ކުރެއްވި ކޮންމެ ކަމެއް ވެސް، އެންމެ ރަނގަޅަށް ކުރެއްވޭތޯ ކަމަށް ވެސް ވިދާޅުވިއެވެ.
"އެވަގުތަކު އޮންނަ ސަރުކާރަކީ މުޅި ރައްޔިތުންނަށް ޚިދުމަތް ދިނުމަށްޓަކާ ނޫންތޯ އޮންނާނީ؟ އެހެންވީމަ، އަޅުގަނޑުމެންނަށް ކުރެވޭނެ އެއްވެސް ކަމެއް އޮތްކަމަށް ވަންޏާ، އަޅުގަނޑުމެން ރައްޔިތުންނަށް ފަސޭހަ ކުރުމަށްޓަކައި ނުވަތަ ޚިދުމަތް ދިނުމަށްޓަކައި، ކުރެވޭ ކަމެއްގައި އަޅުގަނޑު ބައިވެރިވާނަން. ޚިދުމަތް ކުރެވޭނެ ކޮންމެ ކަމެއްގައި ހުއްޓަސް ކުރެވޭނެ." ފައިޞަލް ވިދާޅުވިއެވެ.
ފައިޞަލް އަށް ނައިބު ރައީސްކަން ލިބިވަޑައިގަތީ އެ ފުރުޞަތު އެމްޑީޕީއާއިއެކު ކޯލިޝަން ހަދައިފައިވާ ޖޭޕީއަށް ލިބުމުން، އެ ޕާޓީގެ ކައުންސިލު މެމްބަރުންގެ މެދުގައި ނެގުނު ވޯޓަކުންނެވެ.
ރައީސް އިބްރާހީމް މުޙައްމަދު ޞާލިޙު ވެރިކަމުގެ ދެވަނަ ދައުރަކަށް ވާދަ ކުރެއްވިއިރު ވެސް ނައިބު ރައީސްގެ މަޤާމަށް ޝައުގުވެރިކަން ހުންނެވި ކަމަށާއި، އެކަން ކުރިން ފާހަގަކުރައްވައިފައިވާނެ ކަމަށް ވެސް ފައިޞަލް ވިދާޅުވިއެވެ. ނަމަވެސް ކަން ދިމާ ކުރި ގޮތުން އެ ފުރުޞަތު ގެއްލިގެން ދިޔައީ ކަމަށާއި، އެކަން ޤަބޫލުކުރެއްވި ކަމަށް ވެސް ވިދާޅުވިއެވެ.
Ads by STO
