އިންތިޚާބީ ރައީސް ހުވާ ނުކުރައްވަނީސް، ޤައުމީ މަސައްކަތް ފައްޓަވައިފި، 24 ގަޑިއިރު އުޅުއްވަނީ އެކަމުގައި: ޣައްސާން
މަޤާމުގެ ހުވާ ނުކުރެއްވި ކަމުގައި ވިޔަސް، އިންތިޚާބީ ރައީީސް ޑރ.މުޙައްމަދު މުޢިއްޒު މިހާރު ވެސް އުޅުއްވަނީ ޤައުމީ މަސައްކަތުގައި ކަމަށް ޕީޕީއެމްގެ ނައިބު ރައީސް މުޙައްމަދު ޣައްސާން މައުމޫން ވިދާޅުވެއްޖެއެވެ.
މަޢުލޫމާތު ލިބިފައިވާ ގޮތުގައި، ރައްޔިތުންގެ މަޖިލީހުގައި ގުރައިދޫ ދާއިރާ ތަމްސީލު ކުރައްވަވާ ޣައްސާން މުޢިއްޒުގެ ކެބިނެޓުގައި ޑިފެންސް މިނިސްޓަރުގެ މަޤާމު ފުރުއްވާނެއެވެ.
ޓީވީ ޗެނަލެއްގައި އިންތިޚާބީ ރައީސްގެ ވެރިކަމާއިމެދު ދެކެވަޑައިގަންވާ ގޮތާއި ގުޅޭގޮތުން ވާހަކަ ދައްކަވަމުން ޣައްސާން ވިދާޅުވީ، ރައީސް މުޢިއްޒު ދިވެހި ރައްޔިތުންނަށް ވެވަޑައިގެންނެވި ވަޢުދުފުޅުތައް ފުއްދަވާނެކަމުގެ 100 އިންސައްތަ ޔަޤީންކަން އެބައޮތް ކަމަށެވެ.
އަދި މަޤާމުގެ ހުވާ ނުކުރެއްވިޔަސް، އަވަހާރަފުޅުލައްޕަވާ ވަގުތު ފިޔަވައި، އެމަނިކުފާނު މިހާރު ވެސް އުޅުއްވަނީ 24 ގަޑިއިރު ޤައުމީ މަސައްކަތުގައި ކަމަށް ވެސް ޣައްސާން ވިދާޅުވިއެވެ.
"ހުވާ ކުރެއްވުމާއިއެކީ އަޅުގަނޑަށް ހަމަ ޔަޤީން އިތުރު ގިޔަރަކަށް ލައްވައިގެން، މަސައްކަތްޕުޅު ގެންދަވާނެކަން. އަދި ދަރަނި ރީސްޓްރަކްޗަރ ކޮށްގެން ނޫނީ، އެހެން ގޮތަކަށް ދައްކައިގެން، ދިވެހީންނެއް އިރާދަކުރެއްވިއްޔާ، ތި ދަންތުރައަކަށް އިރާދަކުރެއްވިއްޔާ، ޑރ.މުޢިއްޒުގެ ވެރިކަމެއްގައެއް ނުއެއް ވެއްޓޭނެ." ޣައްސާން ވިދާޅުވިއެވެ.
ޣައްސާން ވަނީ މުޢިއްޒުގެ ވެރިކަމުގައި ދިވެހީންގެ ސިޔާދަތު އޮންނާނީ ދިވެހީންގެ އަތުގައި ކަމަށާއި، އެއީ ޔަޤީން ކުރެވޭ ކަމެއް ކަމަށް ވެސް ވިދާޅުވެފައެވެ.
ުއިންތިޚާބީ ރައީސް މަޤާމުގެ ހުވާ ކުރައްވާނީ، މި މަހުގެ 17 ވަނަ ދުވަހުއެވެ. މި ރަސްމިއްޔާތު އޮންނާނީ އެ ދުވަހު ހަވީރު ޖުމްހޫރީ މައިދާނުގައެވެ. ޑރ.މުޢިއްޒު އަކީ ދިވެހި ޖުމްހޫރިއްޔާގެ އަށް ވަނަ ރައީސްއެވެ.
ަ
