މިލަންދޫ ދާއިރާގެ ޕީޕީއެމް/ޕީއެންސީގެ ޕްރައިމަރީގައި ނަބީލް ވާދަ ކުރައްވަނީ
ޕީއެންސީގެ ސެނެޓަރ ނަބީލް ޒަމީލް ޕީޕީއެމް/ޕީއެންސީގެ ރައްޔިތުންގެ މަޖިލީހުގެ ޕްރައިމަރީގައި ވާދަ ކުރައްވަން ނިންމަވައިފިއެވެ.
އޭނާ ވާދަ ކުރައްވަނީ ށ.މިލަންދޫ ދާއިރާއަށެވެ. ނަބީލް މިކަން ހާމަކުރައްވައި ފޭސްބުކްގައި މިއަދު ކުރެއްވި ޕޯސްޓެއްގައި ވަނީ މަދު ބައިވެރިންނާއި އެކުގައި ވިޔަސް، މަގުމައްޗަށް ނުކުމެ ޕީޕީއެމް/ޕީއެންސީގެ މެމްބަރުންގެ ޙައްޤުގައި ވަކާލާތު ކޮށްދެއްވައިފައިވާނެކަން ފާހަގަކުރައްވައިފައެވެ. ނަބީލަކީ އިދިކޮޅުގައި އޮތްއިރު، ޕީޕީއެމް/ޕީއެންސީގެ މަގުމަތީ ހަރަކާތްތަކުގައި ބައިވެރިވެ، ވަރަށް ގިނަ ފަހަރު ހައްޔަރުވެސް ވެފައިވާ ފަރާތެކެވެ.
އޭނާ ކުރެއްވި ޕޯސްޓުގައި ވަނީ ކުރިއަށް އޮތީ ބުރަ މަސައްކަތެއްކަން ޤަބޫލުކޮށް އިންތިޚާބީ ރައީސް ޑރ. މުޙައްމަދު މުއިއްޒުގެ ސަރުކާރު ދިފާޢުކޮށް ރައީސް ޔާމީން އަބްދުލްޤައްޔޫމާއި ޕީޕީއެމް/ޕީއެންސީގެ ކޯލިޝަންގެ ތަސައްވުރު ހާސިލުކުރުމަށް ސަރުކާރުން މަސައްކަތް ކުރާއިރު ޤާނޫނީ ގޮތުން މަޖިލީހުގެ ޒިންމާ އަދާކޮށް، ސަރުކާރު ދިފާއުކޮށް، ޖަވަަބުދާރީކޮށް، ރައްޔިތުންގެ ހެވަށާއި ލާބައަށް އަބަދާއި އަބަދުމެ މަސައްކަތް ކުރާނެ ކަމުގެ ޔަޤީންކަން އަރުވާ ކަމަށް ވިދާޅުވެފައެވެ.
"އަޅުގަނޑުމެން އެނެމެން ކުރި މަސައްކަތުން ގެނައި ސަރުކާރު ދިފާއުކުރެވޭނީވެސް އަޅުގަނޑުމެންނަށް. އިތުބާރުކުރައްވާ! އަޅުގަނޑަށް ތާއީދުކޮށްދެއްވާ! އަޅުގަނޑަކީ ތިޔަ ރައްޔިތުންގެ ކެންޑިޑޭޓް." އޭނާގެ ޕޯސްޓުގައިވެއެވެ.
ޕީޕީއެމް/ޕީއެންސީގެ މަޖިލިސް ޕްރައިމަރީ އޮންނާނީ އަންނަ ޖެނުއަރީ މަހުގެ 20 ވަނަ ދުވަހުއެވެ.
