ވީއައިއޭ ނިންމަން ބޭނުންވާ ފައިސާ ހަމަޖެއްސީ އެމަނިކުފާނުގެ ހުށަހެޅުމަކަށް ކަމަށް މުޢިއްޒު ވިދާޅުވެއްޖެ
ވެލާނާ އިންޓަނޭޝަނަލް އެއާޕޯޓް (ވީއައިއޭ) މަޝްރޫޢު ނިމުމަށް ބޭނުންވާ ފައިސާގެ ތެރެއިން ޔޫއޭއީ އިން ހަމަޖައްސައިދިން 80 މިލިއަން ޑޮލަރު ހަމަޖެއްސީ އެމަނިކުފާނުގެ ހުށަހެޅުމަކަށް ކަމަށް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ޑރ މުޢިއްޒު ވިދާޅުވީ އެއީ އެމަނިކުފާނު ޔޫއޭއީއަށް ކުރެއްވި ނުރަސްމީ ދަތުރުފުޅުގެ ތެރެއިން، ކުރިއަށް ގެންދިޔަ ބައްދަލުވުމެއްގައި ހުށަހެޅުއްވި ކަމެއް ކަމަށާއި، ކުރިން އެކަން ނިމިފައިނުވާނެ ކަމަށެވެ.
އޭގެ ކުރީގައި އެއްވެސް ކަމެއް ނިމިފައި އޮތް ކަމެއް ނޫން. އަޅުގަނޑު އެ ބޭފުޅުންގެ ހުއްދަ ހޯދައިގެން މާލެ އައިސްފައި އިއުލާނު ކުރީ ވެސް. ޑރ މުއިއްޒު ވިދާޅުވިއެވެ.
މިކަން ކުރިއަށް ގެންދާނީ ކަމާއި ބެހޭ އުސޫލުތަކުގެ ތެރެއިން، މިހާރުވެސް އަބޫދާބީ ފަންޑުން އެހީތެރިކަންދޭ އުސޫލުގެ ދަށުން ފިނޭންސް މިނިސްޓްރީއާ ގުޅިގެން ކަމަށް ވެސް އެމަނިކުފާނު ވިދާޅުވިއެވެ.
އިންތިޚާބީ ރައީސްގެ ވާހަކަފުޅުގައި ރާއްޖޭގެ މައި އެއަރޕޯޓުގެ މިހާރު ހަވާލު ކުރެވިފައި ހުރި މަސައްކަތްތަކުގެ ތެރެއިން ނިމުނީ 54 އިންސައްތަ މަސައްކަތް ކަމަށާއި، ބޭނުންވަނީ އަންނަ އަހަރުގެ އޮކްޓޯބަރު މަހަށް މަޝްރޫޢު ނިންމަންކަމުގައި އެ ވިދާޅުވިއެވެ.
އެއާޕޯޓް މަޝްރޫޢު ނިންމުމަށް ސައުދީ އަރަބިއްޔާ އިން ވެސް ވަނީ 100 މިލިއަން ޑޮލަރު ދޭން ނިންމައިފައެވެ.
ަ
