މި ހިނގާ 19 ވަނަ މަޖިލީހަކީ، މިހައިތަނަށް ހިނގައިފައި އޮންނާނެ އެންމެ ޑިމޮކްރެޓިކް މަޖިލިސް: ނަޝީދު

އެއްވެސް ތައައްސުބެއް ނެތި ބައްލަވައިފިނަމަ، މި ހިނގާ 19 ވަނަ ރައްޔިތުންގެ މަޖިލީހަކީ ދިވެހިރާއްޖޭގައި މިހައިތަނަށް ހިނގައިފައި އޮންނާނެ އެންމެ ޑިމޮކްރެޓިކް މަޖިލިސް ކަމަށް މަޖިލީހުގެ ރައީސްގެ މަޤާމުން އިސްތިއުފާ ދެއްވި މުޙައްމަދު ނަޝީދު ވިދާޅުވެއްޖެއެވެ.

Ads by MWSC

މަޤާމުން އިސްތިއުފާ ދެއްވުމަށްފަހު، މިއަދު ނޫސްވެރިންނާއި ބައްދަލުކުރައްވައި ރައީސް ނަޝީދު ވިދާޅުވީ، މިހައިތަނަށް އެންމެ ގިނަ މަސައްކަތް ކުރީ 19 ‏ވަނަ މަޖިލީހުންނެވެ.

"އެންމެ ގިނަ ބިލު ވެސް ފާސްކުރީ މި މަޖިލީހުން. އަދި އެހެންވެސް މަޖިލީހުގައި ހުރި އެންމެ ގިނަ ކަންކަން ކުރެވިފައިވާ މަޖިލިސް. އަޅުގަނޑު ވަރަށް އުފާވޭ، އަޅުގަނޑަށް ފުރުސަތު ލިބުމުން." ނަޝީދު ވިދާޅުވިއެވެ.

އެމަނިކުފާނު އިތުރަށް ވިދާޅުވީ ރާއްޖޭގެ ޑިމޮކްރެޓިކް ހަޔާތް އޮތީ ކުރިއަށް ކަމަށެވެ.

އެމަނިކުފާނު މިހެން ވިދާޅުވިއިރު، އެމްޑީޕީން ޢަމަލު ކުރަނީ ޑިމޮކްރަސީގެ އަސާސްތަކަށް ނުރައްކާ ވާ ގޮތަށް ކަމަށް ރައީސް ނަޝީދު ވަނީ އިސްތިއުފާގެ ސިޓީގައި ވިދާޅުވެފައެވެ.

ރައީސް ނަޝީދު ވިދާޅުވީ ރައްޔިތުންގެ މަޖިލީހަށް ހުށަހަޅާފައިވާ އެމަނިކުފާނުގެ އިތުބާރު ނެތްކަމުގެ މައްސަލާގައި ރާއްޖޭގެ ޑިމޮކްރެޓިކް ވެރިކަމުގެ ނިޒާމަށް ކުރާނެ އަސަރު ވަރަށް ބޮޑު ކަމަށެވެ. އެމަނިކުފާނު ދެކެވަޑައިގަންނަވާ ގޮތުގައި ޑިމޮކްރެސީގެ އަސާސްތަކާ އުސޫލްތަކަށް ނުރައްކާވާފަދަ އަމަލުތައް އެމްޑީޕީން ހިންގާފައިވާ ކަމަށް ވެސް ވިދާޅުވެފައިވެއެވެ.

އިތުބާރު ނެތްކަމުގެ މައްސަލައާއި ގުޅިގެން ސުޕްރީމް ކޯޓުން ނެރުނު ހުކުމުގައި ވެސް މިކަމުގެ ބިރުވެރިކަމާމެދު އަލިއަޅުވާލާފައިވާ ކަމަށް ނަޝީދު ވިދާޅުވިއެވެ.

ރައްޔިތުންގެ މަޖިލީހުގެ ރައީސް ކަމުން ނަޝީދު މިއަދު އިސްތިއުފާ ދެއްވި އިރު އެމަނިކުފަނުގެ އިތުބަރު ނެތްކަމުގެ މައްސަލަ 49 މެމްބަރުންގެ ސޮޔާ އެކު އެމްޑީޕީން ވަނީ ހުށަހަޅައިފައެވެ.