މީޑިއާތަކަށް ފައިސާ ދިނުމަށް ބަޖެޓު ދިރާސާ ކޮމެޓީއަށް ހުށަހަޅުއްވަނީ
އަންނަ އަހަރަށް ކަނޑައަޅާ ދައުލަތުގެ ބަޖެޓުގައި މީޑިއާތަކަށް ފައިސާ ދޭނެ ވަކި އިންސައްތައެއް ހަމަޖައްސަން މަސައްކަތް ކުރައްވާނެ ކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރޭ ބޭއްވި ނޫސްވެރިންގެ ގުންޒަރުގައި ޑރ.މުޢިއްޒު އާއި އިންތިޚާބީ ނައިބު ރައީސް ވަނީ ރާއްޖޭގެ ނޫޫސްވެރިންނާއި ބައްދަލުކުރައްވައިފައެވެ.
މި ގުންޒަރުގައި އިންތިޚާބީ ރައީސްގެ ވާހަކަފުޅުގައި، އެމަނިކުފާނު އުފައްދަވާނީ ނޫޫސްވެރިން ކުރާ ހުރިހައި ސުވާލުތަކަށް ޖަވާބު ދޭނެ، ދެ ފުށް ފެންނަ ސަރުކާރެއް ކަމަށް ވިދާޅުވިއެވެ.
އަދި ދައުލަތުގެ ބަޖެޓުން ފައިސާދީ، ނޫޫސްވެރިންނަށް ދިމާވާ މާލީ ދަތިތައް ޙައްލު ކުރަން ސަރުކާރުން އެހީތެރިވާނެ ކަމަށް ރިޔާސީ ކެމްޕެއިނުގައި ވެވަޑައިގެންނެވި ވަޢުދު ތަކުރާރު ކުރެއްވިއެވެ.
"އަޅުގަނޑު ކެމްޕެއިންގައި ވަޢުދު ވިން، ދައުލަތުގެ ބަޖެޓުން ކޮންމެވެސް ކަހަލަ އިންސައްތައެއް އެކަމަށް ހަމަޖެއްސުމަށް. އެގޮތަށް ކަނޑައަޅާނެ ކަމަށް."
ބަޖެޓު މަރުހަލާގެ ތެރެއިން މިކަމަށް މަސައްކަތްކޮށް ވަކި އިންސައްތައެއް ހިމަނަން އެދިވަޑައިގަންނަވާ ކަމަށް ވެސް އެމަނިކުފާނު ވިދާޅުވިއެވެ.
"ގައިމުވެސް އަޅުގަނޑުމެންގެ މެމްބަރުން އެތަނުގަ ވަރަށް މަދުވާނެ. އެހެންވީމަ އެމްޑީޕީގެ މަޖިލިސް މެމްބަރުން މިކަމުގަ އަޅުގަނޑުމެންނަށް އެއްބާރުލުން ދެއްވުމަކީ އަޅުގަނޑު ވަރަށް އެދޭނެ ކަމެއް. އަޅުގަނޑުމެންނަށް އެއްބާރުލުން ދެއްވައިފިއްޔާ، މި ފަހަރު ފާސްވާ ބަޖެޓުގެ ތެރޭގައި ވެސް އެކަމަށްޓަކައި ޖާގަ އުފެދިގެންދާނެ." އިންތިޚާބީ ރައީސް ވިދާޅުވިއެވެ.
މި ފައިސާ މީޑިއާތަކަށް ދެވޭނީ، ޕަބްލިޝް ކުރެވޭ އުސޫލެއްގެ ތެރެއިންކަން ވެސް އެމަނިކުފާނު ފާހަގަކުރެއްވިއެވެ. މީގެ އިތުރުން މުޢިއްޒު ވަނީ ބޮޑު ކުލީގައި މީޑިއާ އޮފީސްތައް ހިންގުމަށް ދިމާވެފައިވާ މައްސަލަ ހައްލު ކުރުމަށް މީޑިއާ ވިލެޖެއް ގާއިމު ކުރައްވާނެ ކަމަށް ވިދާޅުވެފައެވެެ.
އެމަނިކުފާނު ވިދާޅުވީ އެމަނިކުފާނު ނިކުންނަވަނީ ދެފުށްފެންނަ ހާމަކަން ބޮޑު ސަރުކާރެއް ހިންގުމަށް ކަމަށާ ސަރުކާރުގެ މިނިސްޓްރީތަކާއި ކުންފުނިތަކުން ފަސޭހައިން މަޢުލޫމާތު ލިބޭނެ އިންތިޒާމުތަކެއް ހަމަޖެހޭނެ ކަމަށެވެ.
