އީސީގެ މެމްބަރު ނަޝާތަށް އިތުރު ދައުރެއް ދިނުމަށް މަޖިލީހުން ފާސްކޮށްފި
އިލެކްޝަންސް ކޮމިޝަން(އީސީ)ގެ މެމްބަރުކަމުގެ އައު ދައުރަކަށް ޢަލީ ނަޝާތު އައްޔަންކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ނަޝާތަށް އިތުރު ދައުރެއް ދޭން ފެންނަ ކަމަށް ވޯޓު ދެއްވީ 42 މެންބަރުންނެވެ. އޭނާއަށް އިތުރު ދައުރެއް ދޭން ނުފެންނަކަމަށް ނުވަ މެންބަރަކު ވޯޓު ދެއްވިއެވެ.
އީސީގެ މެމްބަރުކަމަށް އަލީ ނަޝާތު އައްޔަންކުރައްވާފައިވަނީ 2018 ވަނަ އަހަރުގެ ޖުލައި މަހުގެ 25 ވަނަދުވަހުއެވެ. އޭނާގެ ދައުރު މިދިޔަ ޖުލައި 25 އަށް ވަނީ ހަމަވެފައެވެ.
އަދި އިތުރު ދައުރަކަށް އީސީއަށް ނަޝާތު ޢައްޔަނު ކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އޭނާގެ ނަން މަޖިލީހަށް ފޮނުއްވެވީ މި އަހަރުގެ މޭމަހު 29 ވަނަ ދުވަހުއެވެ.
އެހެންނަމަވެސް، އޭގެ ފަހުން މަހެއްވާން ގާތްވެފައިވަނިކޮށް ޖޫންމަހުގެ 22 ވަނަދުވަހު މަޖިލީހުން ޗުއްޓީއަށް ދިޔައީ އެކަމާއި މެދު ގޮތެއް ނުނިންމަވައެވެ. އެހެންކަމުން ސެޕްޓެމްބަރުމަހު ބޭއްވި ރިޔާސީ އިންތިޚާބުގެ ކަންކަން ކުރިއަށްދިޔައީ އިލެކްޝަންސް ކޮމިޝަންގެ 4 މެންބަރުންނާއި އެކުއެވެ.
