އިންތިޚާބީ ރައީސްގެ ފުރަތަމަ 100 ދުވަހުގެ ވަޢުދުފުޅުތައް އިފްތިތާޙު ކޮށްފި
އިންތިޚާބީ ރައީީސް ޑރ.މުޙައްމަދު މުޢިއްޒުގެ ވެރިކަމުގެ ފުރަތަމަ 100 ދުވަހުގެ ވަޢުދުތައް ހިމެނޭ "ހަފްތާ 14" މަގުޗާޓު އިފްތިތާޙު ކޮށްފިއެވެ.
މި މަގުޗާޓުގައި 172 ވަޢުދު ހިމެނޭއިރު، ވަޢުދުތައް ބެހިފައިވަނީ އަށް ދާއިރާ އަކަށެވެ. ދަރުބާރުގޭގައި ބޭއްވި ޚާއްޞަ ރަސްމިއްޔާތެއްގައި މި މަގުޗާޓު އިފްތިތާޙު ކޮށްދެއްވީ އިންތިޚާބީ ރައީސް ޑރ.މުޙައްމަދު މުޢިއްޒުއެވެ.
ހަފްތާ14 މަގުޗާޓުގައިވާ ވަޢުދުތަކަށް ބަލާއިރު، ރާއްޖޭގައި ތިބި ބޭރުގެ ސިފައިން ބޭލުމުގެ މަސައްކަތް، އެންމެ ފުރަތަމަ ދުވަހު ފަށަން ވަނީ ނިންމައިފައެވެ. ދޭދޭ ޤައުމުތަކާއިއެކު ވެފައިވާ އެއްބަސްވުންތަކުގައި، ދިވެހީންގެ ސިޔާދަތާއި ފުށުއަރާ ކަންކަން ނުވަތަ ނުކުތާތައް އެ އެއްބަސްވުންތަކުން އުނި ކުރުމުގެ މަސައްކަތް ކުރުމަށް ވަނީ ނިންމައިފައެވެ.
އަދި ރާއްޖޭގެ ކަނޑުގެ ސަރަހައްދުން ގެއްލިގެން ދިޔަ ބައި ހޯދުމަށްޓަކައި، އިޓްލޮސްއަށް މައްސަލަ އިސްތިއުނާފު ކުރުމަށް ވެސް ވަނީ ނިންމައިފައެވެ.
އިންތިޚާބީ ރައީސް މިރޭ ވިދާޅުވީ، އެމަނިކުފާނު ވެވަޑައިގެންނެވި ކޮންމެ ވަޢުދުފުޅެއްވެސް މުހިންމު ކަމަށާއި، ފުރަތަމަ 100 ދުވަސްތެރޭގައި ސަރުކާރުން ކުރަން ރާވައިފައިވާ ކަންކަމަށްވުރެ އިތުރަށް ވެސް ކަންކަން ހާސިލު ކުރުމަކީ އަމާޒު ކަމަށެވެ.
Ads by STO
