އިލެކްޓްރިކް ވެހިކަލްގެ ބެޓެރީ އުފެއްދުން އިތުރުކުރުމަށް އިންޑިއާއިން 8،000 ކްރޯޑް ރުޕީސްގެ ޕްލޭނެއް އިފްތިތާހުކޮށްފި
ބްލޫމްބާގްގެ ރިޕޯޓެއްގައި ހާމަކޮށްފައިވާ ގޮތުގައި އިލެކްޓްރިކް ވެހިކަލް ބެޓެރީ އުފެއްދުމަށް ހާއްސަކޮށްފައިވާ ގާތްގަނޑަކަށް 8،000 ކްރޯޑް ރުޕީސް (960 މިލިއަން ޑޮލަރު) ގެ އިންސެންޓިވް ސްކީމެއްގެ ބިޑް ޕްރޮސެސް އިންޑިއާއިން ފަށަން ތައްޔާރުވެއްޖެ އެވެ. މި ސްކީމްގެ ދަށުން ކާމިޔާބު ބިޑް ހުށަހަޅާ ފަރާތްތަކަށް ޒަމާނީ ކެމިސްޓްރީ ބެޓެރީ ޕްލާންޓްތައް ގާއިމުކުރަން ލާޒިމްވާނެ އެވެ. ކުރިއަށް އޮތް މަހުގެ ތެރޭގައި އިންވެސްޓަރުންގެ ބިޑަށް ސަރުކާރުން ދައުވަތު ދިނުމަށް ވަނީ ހަމަޖެހިފަ އެވެ.
ބްލޫމްބާގުން ބުނި ގޮތުގައި ދެކުނު ކޮރެއާގެ އެލްޖީ އެނާޖީ ސޮލިއުޝަން ލިމިޓެޑާއި މަހިންދްރާ އެންޑް މަހިންދްރާ ލިމިޓެޑް، އަމާރާ ރާޖާ އެނާޖީ އެންޑް މޮބިލިޓީ ލިމިޓެޑް، އެގްސައިޑް އިންޑަސްޓްރީޒް ލިމިޓެޑް އަދި ލާސަން އެންޑް ޓޫބްރޯ ލިމިޓެޑް ފަދަ މަޝްހޫރު ލޯކަލް ކުންފުނިތަކުން ސަރުކާރުގެ އޮފިޝަލުންނާ އެކު ބޭއްވި މަޝްވަރާ ބައްދަލުވުމެއްގައި ޝައުގުވެރިކަން ފާޅުކުރި އެވެ. ކުންފުނިތަކަށް އިނާޔަތްތައް ދިނުމަށް ހަމަޖެހިފައިވަނީ ފަސް އަހަރު ދުވަހުގެ މުއްދަތެއްގައި ލޯކަލްކޮށް އުފައްދާ ބެޓެރީވިއްކުމަށް ބަލައިގެންނެވެ.
އޭގެ ކުރީ އަހަރު ބިލިއަނަރު މުކޭޝް އަމްބާނީގެ ރިލަޔަންސް އިންޑަސްޓްރީޒް ލިމިޓެޑާއި އޯލާ އިލެކްޓްރިކް މޮބިލިޓީ ޕްރައިވެޓް އަދި ރާޖޭޝް އެކްސްޕޯޓްސް ލިމިޓެޑުން 30 ގިގަވޮޓް ގަޑިއިރުގެ ބެޓެރީ ކެޕޭސިޓީ އުފެއްދުމަށް ހޮވައި، ސަރުކާރުގެ ޕްރޮގްރާމްގެ ފުރަތަމަ މަރުހަލާގައި އިނާޔަތްތައް ވަނީ ލިބިފަ އެވެ.
ޑިމާންޑް އިތުރުވާނެ ކަމަށް ލަފާކޮށް ރިސާޗް ސެންޓަރު އާރްއެމްއައި އިންޑިއާ އާއި ސަރުކާރުގެ ތިންކް ޓޭންކް ނިތީ އަޔޯގް އިން ޝާއިއުކޮށްފައިވާ ރިޕޯޓެއްގައި ވަނީ 2030 ވަނަ އަހަރުގެ ނިޔަލަށް 260 ގިގަވޮޓް ގަޑިއިރުގެ ބެޓެރީ ބޭނުންވާނެ ކަމަށް އަންދާޒާކޮށްފަ އެވެ.
